ܓܵܘ ܐܸܘܲܢܓܵܠܝܼܘܿܢ ܕܐܸܕܝܵܘܡ ܒܸܚܙܵܝܵܐ ܝܘܲܚ ܩܵܐܕ ܝܼܫܘܿܥ ܡܫܝܼܚܵܐ ܡ̣ܢ ܒܵܬ̄ܪ ܕܫܩܸܠܸܗ ܡܲܥܡܘܿܕܝܼܬܵܐ ܡ̣ܢ ܐܝܼܕܵܐ ܕܝܘܼܚܲܢܵܢ ܡܲܥܡܸܕܵܢܵܐ ܦܸܫܠܸܗ ܠܘܼܒܠܵܐ ܡ̣ܢ ܪܘܼܚܵܐ ܕܩܘܼܕܫܵܐ ܠܒܲܪܝܼܵܐ ܕܦܵܐܸܫ ܓ̰ܘܼܪܒܵܐ ܡ̣ܢ ܐܵܟ̣ܸܠܩܲܪܨܵܐ (ܣܵܛܵܢܵܐ) ܗ̇ܘ ܦܝܵܫܵܐ ܝܠܸܗ ܓ̰ܘܼܪܒܵܐ ܒܐܵܢܝܼ ܓ̰ܘܼܪܵܒܸܐ ܒܸܕ ܬܵܦܩܝܼ ܒܟܠ ܚܲܕ̄ ܐ̄ܢܵܫܵܐ. ܓܵܘ ܟܬܵܒ̣ܵܐ ܕܝܵܬܸܩܸܐ ܚܕܲܬܵܐ ܒܸܚܙܵܝܵܐ ܝܘܲܚ ܕܐܝܼܬ ܬܪܸܝܢ ܬܲܗܵܪܸܐ ܕܓ̰ܘܼܪܵܒܸܐ ܚܲܕ̄ ܡܸܢܵܝ ܝܼܠܸܗ ܓ̰ܘܼܢܓ̰ܵܪܸܐ ܘܡܲܪܥܵܐ ܘܚܲܫܵܐ ܕܡ̣ܢ ܠܒ̣ܲܕܵܪ (ܒܲܪܵܝܵܐ) ܒܸܬܦܵܩܵܐ ܝܢܵܐ ܒܐ̄ܢܵܫܵܐ ܘܐ̄ܚܸܪ̄ܢܵܐ ܝܼܠܸܗ ܡܲܝܠܸܐ ܒܝܼܫܸܐ ܕܐܝܼܬ ܒܓܵܘܲܢ ܘܟܸܐ ܓܵܪܫܝܼܠܸܗ ܠܒܲܪܢܵܫܵܐ ܠܓܸܒ ܚܛܝܼܬܵܐ. ܠܲܐܟ̣ܵܐ ܓܵܘ ܐܸܘܲܢܓܵܠܝܼܘܿܢ ܕܐܸܕܝܵܘܡ ܓ̰ܘܼܪܒܵܐ ܡܘܼܕܟ̣ܸܪܵܐ ܝܼܠܸܗ ܗ̇ܘ ܕܬܪܸܝܢ ܝܵܥܢܸܐ ܡ̣ܢ ܓܵܘܵܐ.

ܠܲܐܙܸܡ ܝܵܕܥܲܚ ܩܵܐܕ ܐܲܠܵܗܵܐ ܠܸܐ ܓ̰ܲܪܸܒ ܠܒܲܪܢܵܫܵܐ ܒܚܛܝܼܬܵܐ ܐܵܗܵܐ ܣܵܛܵܢܵܐ ܝܠܸܗ ܕܒܡܸܨܥܵܝܘܼܬܵܐ ܕܡܲܝܠܸܐ ܒܝܼܫܸܐ ܕܐܝܼܬ ܒܓܵܘܲܢ ܒܸܓܪܵܫܲܢ ܠܸܗ ܠܓܸܒ ܚܛܝܼܬܵܐ. ܐܵܦܸܢ ܓܵܘ ܝܼܫܘܿܥ ܡܫܝܼܚܵܐ ܠܝܼܬ ܗܘܵܐ ܠܵܐ ܡܲܝܠܸܐ ܒܝܼܫܸܐ ܘܠܵܐ ܚܛܝܼܬܵܐ ܐܝܼܢܵܐ ܪܘܼܚܵܐ ܕܩܘܼܕܫܵܐ ܠܘܼܒܸܠܸܗ ܠܒܲܪܝܼܵܐ ܕܦܵܐܸܫ ܓ̰ܘܼܪܒܵܐ. ܢܦܵܠܬܵܐ ܓܵܘ ܓ̰ܘܼܪܵܒܵܐ ܠܸܐ ܝܠܵܗ̇ ܚܛܝܼܬܵܐ ܐܸܠܵܐ ܡܲܫܠܲܡܬܵܐ (ܬܲܣܠܲܡܬܵܐ) ܕܓܵܢܵܐ ܩܵܐ ܓ̰ܘܼܪܵܒܵܐ ܝܼܠܵܗ̇ ܚܛܝܼܬܵܐ ܘܒܸܚܙܵܝܵܐ ܝܘܲܚ ܕܡܫܝܼܚܵܐ ܠܵܐ ܬܘܼܣܠܸܡܠܸܗ ܓܵܢܸܗ ܩܵܐ ܚܛܝܼܬܵܐ. ܗ̇ܘ ܡ̣ܢ ܩܵܕ̄ܡ ܕܦܵܐܸܫ ܓ̰ܘܼܪܒܵܐ ܨܸܡܠܸܗ ܐܲܪܒܥܝܼ ܝܵܘܡܵܢܸܐ ܘܐܲܪܒܥܝܼ ܠܲܝܠܵܘܵܬܸܐ. ܒܸܦܪܵܩܬܵܐ ܦܸܫܠܸܗ ܓ̰ܘܼܪܒܵܐ ܒܝܲܕ ܓ̰ܲܪܒܵܢܵܐ ܬܠܵܬܵܐ ܓܵܗܸܐ ܬܠܵܬܵܐ ܓ̰ܘܼܪܵܒܸܐ ܩܵܐܕ ܒܲܪܢܵܫܵܐ ܩܲܕ̄ܡܵܝܵܐ ܐܵܕܵܡ ܘܚܵܘܵܐ ܦܸܫܠܗܘܿܢ ܓ̰ܘܼܪܒܸܐ ܒܝܼܝܵ ܘܬܘܼܣܠܸܡܠܗܘܿܢ ܠܓܵܢܵܝ. ܐܝܼܢܵܐ ܝܼܫܘܿܥ ܡܫܝܼܚܵܐ ܓ̣ܠܸܒܠܸܗ ܥܲܠܵܝ. ܐܲܢܸܐ ܬܠܵܬܵܐ ܓ̰ܘܼܪܵܒܸܐ ܗܲܪ ܐܵܢ ܬܠܵܬܵܐ ܓ̰ܘܼܪܵܒܸܐ ܝܢܵܐ ܕܦܝܼܫܸܐ ܝܢܵܐ ܡܘܼܕܟ̣ܸܪܸܐ ܓܵܘ ܐܸܓܲܪܬܵܐ ܩܲܕܡܵܝܬܵܐ ܕܝܘܼܚܲܢܵܢ ܩܸܦܵܠܸܐܘܿܢ ܕܬܪܸܝܢ ܡܸܢܝܵܢܵܐ 16 ܝܵܥܢܸܐ ܫܲܗܘܵܬܬܵܐ ܕܦܲܓ̣ܪܵܐ ܘܫܲܗܘܵܬܬܵܐ ܕܥܲܝܢܵܐ ܘܫܘܼܒ̣ܗܵܪܵܐ ܕܥܵܠܡܵܐ.

ܗ̇ܝ ܩܲܕܡܵܝܬܵܐ ܣܵܛܵܢܵܐ ܟ̰ܘܼܠܸܫܠܸܗ ܕܕܵܪܸܐ ܫܝܼܟܘܼܬܵܐ ܒܠܸܒܵܐ ܕܝܼܫܘܿܥ ܩܵܐܕ ܝܼܠܸܗ ܒܪܘܿܢܵܐ ܕܐܲܠܵܗܵܐ ܝܲܢ ܠܵܐ. ܗ̇ܝ ܥܕܵܢܵܐ ܕܐ̄ܡܸܪܸܗ ܩܵܬܸܗ ܐܸܢ ܒܪܘܿܢܵܐ ܕܐܲܠܵܗܵܐ ܝܘܸܬ ܐ̄ܡܘܿܪ ܕܐܲܢܸܐ ܟܸܐܦܸܐ ܗܵܘܝܼ ܠܲܚܡܵܐ ܐܵܗܵܐ ܒܘܼܩܵܪܵܐ ܒܸܕ ܥܵܒ̣ܸܕܠܸܗ ܡܸܢܸܗ ܐܝܼܡܲܢ ܕܝܼܫܘܿܥ ܝܼܠܸܗ ܥܲܠ ܙܩܝܼܦܵܐ ܕܒܸܐܡܵܪܵܐ ܝܠܸܗ ܐܸܢ ܒܪܘܿܢܵܐ ܕܐܲܠܵܗܵܐ ܝܘܸܬ ܨܠܝܼ ܡ̣ܢ ܙܩܝܼܦܵܐ ܬܸܪܘܵܝ ܚܲܕ̄ ܡܸܢܕܝܼ ܝܢܵܐ ܐܝܼܢܵܐ ܝܼܫܘܿܥ ܠܸܐ ܝܠܸܗ ܩܲܒܘܼܠܸܐ.

ܐܵܗܵܐ ܓ̰ܘܼܪܒܵܐ ܕܫܲܗܘܵܬܬܵܐ ܕܦܲܓ̣ܪܵܐ ܘܗ̇ܘ ܐܝܼܠܵܢܵܐ ܕܝܕܸܥܬܵܐ ܛܵܒ̣ܬܵܐ ܘܒܝܼܫܬܵܐ ܕܐܵܕܵܡ ܘܚܵܘܵܐ ܝܠܸܗ. ܐܝܼܢܵܐ ܡܫܝܼܚܵܐ ܓ̰ܘܼܘܸܒܠܸܗ ܠܸܐ ܝܠܵܗ̇ ܐܲܚܟ̰ܝܼ ܒܠܲܚܡܵܐ ܒܸܕ ܚܲܝܸܐ ܒܲܪܢܵܫܵܐ ܐܸܠܵܐ ܒܟܠ ܗܸܡܸܙܡܵܢ ܕܦܵܠܛܵܐ ܡ̣ܢ ܦܘܼܡܵܐ ܕܐܲܠܵܗܵܐ. ܒܲܪܢܵܫܵܐ ܣܢܝܼܩܵܐ ܝܠܸܗ ܠܗܸܡܸܙܡܵܢ ܕܐܲܠܵܗܵܐ ܘܠܲܚܡܵܐ ܪܘܼܚܵܢܵܝܵܐ ܕܝܼܠܸܗ ܩܲܒܲܠܬܵܐ ܕܪܙܵܝܵܐ ܕܐܲܠܵܗܵܐ.

ܓ̰ܘܼܪܵܒܵܐ ܕܬܪܸܝܢ ܝܼܠܸܗ ܫܲܗܘܵܬܬܵܐ ܕܥܲܝܢܵܐ. ܟܸܐ ܝܵܕܥܲܚ ܕܡܫܝܼܚܵܐ ܠܵܐ ܐ̄ܬܸܠܸܗ ܠܐܵܗܵܐ ܕܘܼܢܝܸܐ ܕܗܵܘܸܐ ܡܲܠܟܵܐ ܐܲܪܥܵܢܵܝܵܐ ܘܠܵܐ ܐ̄ܬܸܠܸܗ ܕܦܵܐܸܫ ܚܩܝܼܪܵܐ ܡ̣ܢ ܒܢܲܝܢܵܫܵܐ ܐܸܠܵܐ ܐ̄ܬܸܠܸܗ ܕܩܲܒܸܠ ܚܲܫܵܐ ܘܡܵܐܸܬ ܡ̣ܢ ܓܸܒܵܐ ܕܚܛܝܼܵܬܸܐ ܕܟܠܲܝ ܒܢܲܝܢܵܫܵܐ ܒܘܼܬ ܕܐܵܗܵܐ ܠܵܐ ܩܘܼܒܸܠܸܗ ܠܛܠܵܒܬܵܐ ܕܣܵܛܵܢܵܐ.

ܓ̰ܘܼܪܒܵܐ ܕܬܠܵܬܵܐ ܕܐܵܗܵܐ ܝܠܸܗ ܕܣܵܛܵܢܵܐ ܒܸܐܡܵܪܵܐ ܝܠܸܗ ܩܵܐ ܡܫܝܼܚܵܐ ܩܵܐܕ ܒܕ ܝܲܗܒ̣ܸܠ ܩܵܬܸܗ ܗܘܼܟܡܵܐ ܕܗܲܟܸܡ ܥܲܠ ܟܠܲܝ ܡܲܠܟܵܘܬܸܐ ܕܕܘܼܢܝܸܐ ܐܸܢ ܕܵܐܸܪ ܡ̣ܢ ܐܲܠܵܗܵܐ ܘܣܵܓ̣ܸܕ ܠܣܵܛܵܢܵܐ. ܐܵܗܵܐ ܓ̰ܘܼܪܵܒܵܐ ܝܼܠܸܗ ܫܘܼܒ̣ܗܵܪܵܐ ܕܥܵܠܡܵܐ ܡܲܬܲܒ̣ܬܵܐ ܕܐܵܢܵܐ ܠܫܵܘܦܵܐ ܕܐܲܠܵܗܵܐ ܝܕܸܥܬܵܐ ܛܵܒ̣ܬܵܐ ܘܒܝܼܫܬܵܐ ܕܝܼܠܵܗ̇ ܐܲܚܟ̰ܝܼ ܩܵܐ ܐܲܠܵܗܵܐ.

ܐܝܼܢܵܐ ܡܫܝܼܚܵܐ ܠܸܐ ܩܲܒܘܼܠܸܐ. ܐܸܢ ܨܦܵܝܝܼ ܬܲܚܡܸܢܲܚ ܒܐܲܢܸܐ ܬܠܵܬܵܐ ܓ̰ܘܼܪܵܒܸܐ ܒܸܕ ܚܵܙܲܚ ܕܵܐܟ̣ܝܼ ܡܫܝܼܚܵܐ ܒܸܟܠܵܝܵܐ ܝܠܸܗ ܩܵܕ̄ܡ ܓ̰ܘܼܪܵܒܸܐ ܕܣܵܛܵܢܵܐ ܒܝܼ ܡܲܦܠܲܚܬܵܐ ܕܗܸܡܸܙܡܵܢ ܕܐܲܠܵܗܵܐ ܡ̣ܢ ܟܬܵܒ̣ܵܐ ܩܕܝܼܫܵܐ ܕܡܲܠܘܼܦܸܐ ܝܠܸܗ ܩܵܬܲܢ ܩܵܐܕ ܕܗܸܡܸܙܡܵܢ ܕܐܲܠܵܗܵܐ ܝܼܠܸܗ ܗ̇ܘ ܙܲܝܢܵܐ (ܐܵܣܠܵܗܸܐ) ܕܠܲܐܙܸܡ ܦܵܐܸܫ ܡܘܼܦܠܸܚܵܐ ܕܲܪܩܘܼܒ̣ܠ ܕܣܵܛܵܢܵܐ ܘܓ̰ܘܼܪܵܒܸܗ. ܗܸܡܸܙܡܵܢ ܕܐܲܠܵܗܵܐ ܝܼܠܸܗ ܣܲܝܦܵܐ ܕܪܘܼܚܵܐ ܩܘܼܕܫܵܐ ܕܝܼܠܸܗ ܙܲܝܢܵܐ ܟܠ ܚܲܕ̄ ܡܫܝܼܚܵܝܵܐ ܒܲܤ ܐܝܼܡܲܢ ܕܣܵܛܵܢܵܐ ܒܸܐܬܵܝܵܐ ܝܠܸܗ ܠܟܸܣܠܲܢ ܐܘܼܦ ܐܲܚܢܲܢ ܙܸܐ ܐ̄ܬܲܢܲܚ ܩܬܸܗ ܪܚܘܿܩ ܡ̣ܢ ܟܸܣܠܲܢ ܣܵܛܵܢܵܐ. ܐܡܝܢ .

ܦܘܫܩܐ ܡ̣ܢ ܩܫ.ܬܐܘܡܐ ܫܝܼܢܘ