|
ܓܵܘ ܐܵܗܵܐ ܣܲܗܡܵܐ ܡ̣ܢ ܐܸܘܲܢܓܲܠܝܼܘ̇ܢ ܒܸܚܙܵܝܵܐ ܝܘܲܚ ܩܵܐܕ ܡ̣ܢ ܒܵܬ̄ܪ ܝܘ̣ܚܵܢܲܢ ܡܲܥܡܸܕܵܢܵܐ ܦܝܵܫܵܐ ܝܠܸܗ ܕܒ̣ܝܼܩܵܐ ܘ ܡܘ̣ܬܒ̣ܵܐ ܓܵܘ ܒܸܝܬ ܐܲܣܝܼܪܸܐ ܝܼܫܘ̇ܥ ܒܸܐܙܵܠܵܐ ܝܠܸܗ ܠܓܠܝܼܠܵܐ ܘ ܫܲܪܘ̣ܝܸܐ ܝܠܸܗ ܒܡܲܫܚܲܕܬܸܗ. ܗ̇ܘ ܗܲܕܟ̣ܵܐ ܫܘ̣ܪܸܐܠܸܗ ܠܡܲܟܪܘ̣ܙܸܐ ܦܪܸܩܠܵܗ̇ ܥܕܵܢܵܐ ܩܘ̣ܪܒܸܢܬܵܐ ܝܠܵܗ̇ ܡܲܠܟܘ̣ܬܵܐ ܕܐܲܠܵܗܵܐ.
ܡܲܠܟܘ̣ܬܵܐ ܕܐܲܠܵܗܵܐ ܝܼܠܵܗ̇ ܚܲܝܠܵܐ ܘ ܩܵܢܘ̇ܢܵܐ ܕܐܲܠܵܗܵܐ ܓܵܘ ܠܸܒܵܐ ܕܒܲܪܢܵܫܵܐ ܘ ܡܫܝܼܚܵܐ ܝܼܠܸܗ ܡܲܠܟܘ̣ܬܵܐ ܕܐܲܠܵܗܵܐ ܕܙܪܸܩܠܸܗ ܠܐܲܪܥܵܐ ܘ ܒܝܼ ܡܸܨܥܵܝܘ̣ܬܵܐ ܕܗ̇ܘ ܦܝܼܫܠܸܗ ܫܡܝܼܛܵܐ ܚܲܝܠܵܐ ܕܒܝܼܫܘ̣ܬܵܐ ܘ ܒܲܪܢܵܫܘ̣ܬܵܐ ܩܘ̣ܒܸܠܵܐ ܚܲܕܘ̣ܬܵܐ ܘ ܫܲܝܢܵܐ ܘ ܫܠܵܡܵܐ. ܒܲܤ ܟܠ ܚܲܕ̄ ܐ̄ܢܵܫܵܐ ܕܝܼܠܸܗ ܗܲܡܘ̣ܢܸܐ ܒܝܼܫܘ̇ܥ ܡܫܝܼܚܵܐ ܗܘܵܝܵܐ ܝܠܸܗ ܗܲܕܵܡܵܐ ܪܘ̣ܫܡܵܝܵܐ ܕܡܲܠܟܘ̣ܬܵܐ ܕܐܲܠܵܗܵܐ ܣܵܒܵܒ ܡܫܝܼܚܵܐ ܐܬܸܠܸܗ ܘ ܫܘ̣ܬܐܸܣܠܸܗ ܚܕܵܐ ܜܵܝܸܦܵܐ ܕܡܲܠܟܘ̇ܗ̇ ܝܼܠܸܗ ܐܲܠܵܗܵܐ.
ܒܵܥܘ̣ܬܵܐ (ܛܠܵܒܬܵܐ) ܕܡܫܝܼܚܵܐ ܡ̣ܢ ܐ̄ܢܵܫܸܐ ܐܵܗܵܐ ܗܘܵܐ ܬܲܘܸܒܘ̇ܢ ܘ ܗܲܡܸܢܘ̇ܢ ܒܐܸܘܲܢܓܲܠܝܼܘ̇ܢ. ܡ̣ܢ ܐܵܗܵܐ ܗܲܡܙܲܡܬܵܐ ܕܡܫܝܼܚܵܐ ܒܸܪܥܵܫܵܐ ܝܘܲܚ ܩܵܐܕ ܐܸܢ ܒܸܒܥܵܝܵܐ ܝܘܲܚ ܕܗܵܘܲܚ ܗܲܕܵܡܸܐ ܕܡܲܠܟܘ̣ܬܵܐ ܕܐܲܠܵܗܵܐ ܦܲܣܘ̣ܥܬܵܐ ܩܲܕܡܵܝܬܵܐ ܝܼܠܵܗ̇ ܬܝܵܒ̣ܘ̣ܬܵܐ ܠܵܐ ܐܲܚܟ̰ܝܼ ܦܫܵܡܬܵܐ ܥܲܠ ܚܛܝܼܵܬܲܢ ܐܸܠܵܐ ܐܝܼܕܵܐ ܓܪܵܫܬܵܐ ܡܸܢܵܝ. ܡܲܥܢܵܝܘ̇ܗ̇ ܐܵܗܵܐ ܝܠܵܗ̇ ܩܵܐܕ ܐܚܸܪܢܵܐ ܠܵܐ ܦܵܠܚܲܚ ܠܵܗ̇ ܗ̇ܝ ܚܛܝܼܬܵܐ ܐܸܢ ܠܵܐ ܬܝܵܒ̣ܘ̣ܬܲܢ ܠܸܐ ܝܠܵܗ̇ ܫܲܪܝܼܪܬܵܐ.
ܡ̣ܢ ܒܵܬ̄ܪ ܬܝܵܒ̣ܘ̣ܬܵܐ ܦܲܣܘ̣ܥܬܵܐ ܕܬܪܸܝܢ ܝܼܠܵܗ̇ ܕܗܲܡܸܢܲܚ ܒܝܼܫܘ̇ܥ ܡܫܝܼܚܵܐ ܦܲܪܘ̇ܩܲܢ ܠܵܐ ܐܲܚܟ̰ܝܼ ܩܵܐܕ ܗ̇ܘ ܝܼܠܸܗ ܐܲܠܵܗܲܢ ܐܝܼܢܵܐ ܦܵܠܚܲܚ ܐܲܝܟ̣ ܨܸܒ̣ܝܵܢܵܐ (ܪܸܙܵܝܵܐ) ܕܝܼܘ̣ܗܝ ܐܸܢ ܗܲܕܟ̣ܵܐ ܠܵܐ ܗܘܵܝܵܐ ܠܸܐ ܝܘܲܚ ܡܫܝܼܚܵܝܸܐ ܫܲܪܝܼܪܸ̈ܐ.
ܟܸܐ ܝܵܕܥܲܚ ܡܲܥܢܵܝܵܐ ܕܐܸܘܲܢܓܲܠܝܼܘ̇ܢ ܝܵܥܢܸܐ ܫܸܚܕܵܐ ܡܲܚܕܝܼܵܢܵܐ ܘ ܗ̇ܘ ܐܵܗܵܐ ܝܠܸܗ ܩܵܐܕ ܐܬܸܐܠܸܗ ܝܼܫܘ̇ܥ ܡܫܝܼܚܵܐ ܠܕܘ̣ܢܝܸܐ ܕܦܲܪܸܩ ܘ ܝܲܗܒ̣ܸܠ ܚܲܝܸܐ ܐܵܒܵܕܝܼܢܵܝܸܐ ܩܵܐ ܟܠ ܐ̄ܢܵܫܵܐ ܕܗܲܡܸܢ ܒܝܼܘ̣ܗܝ.
ܡܫܝܼܚܵܐ ܟܠ ܚܲܕ̄ ܐܢܵܫܵܐ ܒܸܫܒ̣ܵܩܘ̣ܗܝ ܠܸܗ ܚܸܐܪܵܐ (ܐܵܙܵܕ) ܩܵܐܕ ܦܵܪܸܫ ܡܲܠܟܘ̣ܬܵܐ ܕܐܲܠܵܗܵܐ ܝܲܢ ܡܲܠܟܘ̣ܬܵܐ ܕܣܵܛܵܢܵܐ ܝܲܢ ܦܘ̣ܪܩܵܢܵܐ ܝܲܢ ܛܠܵܩܵܐ ܕܠܐܵܒܵܕ.
ܣܲܗܡܵܐ ܕܬܪܸܝܢ ܕܐܸܘܲܢܓܲܠܝܼܘ̇ܢ ܒܸܚܙܵܝܵܐ ܝܘܲܚ ܩܵܐܕ ܡܫܝܼܚܵܐ ܐܲܪܒܥܵܐ ܬܲܠܡܝܼܕܘ̣ܗܝ ܩܲܕܡܵܝܸܐ ܒܸܦܪܵܫܵܐ ܝܠܸܗ. ܩܲܕܡܵܝܵܐ ܫܸܡܥܘ̇ܢ ܕܦܝܼܫܠܸܗ ܩܸܪܝܵܐ ܟܸܐܦܵܐ ܘ ܐܲܢܕܪܸܐܘ̇ܤ ܐܲܚܘ̇ܢܸܗ ܕܒܸܕܪܵܝܵܐ ܗܘܵܘ ܓܲܪܕܵܐ ܓܵܘ ܝܵܡܵܐ ܕܓܠܝܼܠܵܐ ܒܵܬܪ ܗܵܕܵܐ ܬܪܸܝܢ ܐܲܚܘ̇ܢܘܵܬܸܐ ܐܚܸܪܢܸܐ ܝܲܥܩܘ̇ܒ ܒܪܘ̇ܢܵܐ ܕܙܲܒܕܲܝ ܘ ܝܘ̇ܚܵܢܲܢ ܐܲܚܘ̇ܢܸܗ ܟܠܵܝ ܫܒ̣ܸܩܠܗܘ̇ܢ ܠܓܵܡܝܼ ܘ ܠܒܵܒܵܝ ܘ ܐܙܝܼܠܗܘ̇ܢ ܒܵܬܪܸܗ. ܐܵܢܝܼ ܡܐܲܝܟ̣ ܒܵܒܵܐ ܐܲܒ̣ܪܲܗܡ ܠܸܐ ܗܘܵܘ ܒܸܕܥܵܝܵܐ ܐܲܝܟܵܐ ܒܸܐܙܵܠܵܐ ܝܢܵܐ ܐܝܼܢܵܐ ܒܸܕܥܵܝܵܐ ܗܘܵܘ ܠܟܸܤ ܡܵܢܝܼ.
ܡܫܝܼܚܵܐ ܟܠ ܚܲܕ̄ ܡܸܢܵܝ ܐܲܝܟ̣ ܚܫܝܼܚܘ̣ܬܵܝ ܒܸܬ ܥܵܒ̣ܸܕܠܗܘ̇ܢ ܨܲܝܵܕܸܐ ܕܒܢܲܝܢܵܫܵܐ. ܝܼܫܘ̇ܥ ܡܫܝܼܚܵܐ ܩܵܐ ܟܠ ܚܲܕ ܡܸܢܲܢ ܒܸܩܪܵܝܵܐ ܝܠܸܗ ܕܐܵܙܲܠܚ ܒܵܬܪܘ̣ܗܝ ܐܝܼܢܵܐ ܒܝܼ ܚܲܕ ܗܸܒ̣ܝܼ ܘ ܠܸܒܵܐ ܡܸܠܝܵܐ ܡ̣ܢ ܗܲܝܡܵܢܘ̣ܬܵܐ.
ܦܘܫܩܐ ܡ̣ܢ ܩܫ.ܬܐܘܡܐ ܫܝܼܢܘ
|
