ܡ̣ܢ ܐܸܘܲܢܓܵܠܝܼܘܿܢ ܕܐܸܕܝܵܘܡ ܟܸܐ ܗܵܘܝܵܐ ܡܛܵܝܵܐ ܠܐܵܗܵܐ ܦܠܵܛܵܐ ܩܵܐܕ ܕܵܐܟ̣ܝܼ ܝܼܠܸܗ ܠܸܒܲܢ ܘܓܵܘܲܢ ܗܵܕܟ̣ܵܐ ܒܸܕ ܗܵܘܝܼ ܕܘܼܒܵܪܲܢ ܘܥܒ̣ܵܕܲܢ ܘܗܲܡܙܲܡܝܵܬܲܢ. ܐܸܢ ܡ̣ܢ ܥܵܠܡܵܐ ܗܵܘܲܚ ܛܥܘܼܢܝܵܬܲܢ ܙܸܐ ܒܸܕ ܗܵܘܝܼ ܡ̣ܢ ܥܵܠܡܵܐ ܘܐܸܢ ܡ̣ܢ ܪܘܼܚܵܐ ܕܩܘܼܕܫܵܐ ܗܵܘܲܚ ܛܥܘܼܢܝܵܬܲܢ ܙܸܐ ܒܸܕ ܗܵܘܝܼ ܡ̣ܢ ܪܘܼܚܵܐ ܕܩܘܼܕܫܵܐ ܝܵܥܢܸܐ ܕܵܐܟ̣ܝܼ ܝܼܠܸܗ ܠܸܒܲܢ ܗܵܕܟ̣ܵܐ ܒܸܕ ܗܵܘܝܵܐ ܗܲܡܙܲܡܬܲܢ.

ܚܲܕ ܐ̄ܢܵܫܵܐ ܡܘܼܡܟܸܢ ܝܠܵܗ̇ ܕܬܲܢܸܐ ܐܵܢܵܐ ܡܫܝܼܚܵܝܵܐ ܝܘܸܢ ܘܐܝܼܬܠܝܼ ܗܲܝܡܵܢܘܼܬܵܐ ܘܩܵܐ ܚܲܕ ܡܸܬܚܵܐ ܙܸܐ ܡܲܚܙܝܼ ܠܵܗ̇ ܓܵܢܸܗ ܐܲܝܟ̣ ܚܲܕ ܡܗܘܼܡܢܵܐ ܐܝܼܢܵܐ ܪܵܒܵܐ ܠܸܐ ܓܵܪܫܵܐ ܟܝܵܢܸܗ ܡܘܼܕܝܼ ܠܸܗ ܒܸܕ ܡܲܚܙܝܼ ܠܸܗ. ܡܵܪܝ ܦܲܛܪܘܼܤ ܫܠܝܼܚܵܐ ܡܲܕܡܘܼܝܸܐ ܝܠܸܗ ܗܵܕܟ̣ܵܐ ܐ̄ܢܵܫܵܐ ܠܚܙܘܼܪܵܐ ܕܣܸܚܝܵܐ ܝܠܸܗ ܘܒܵܬ̄ܪ ܗܵܕܵܐ ܓܲܪܡܘܼܠܘܼܗܝ ܠܸܗ ܓܵܢܸܗ ܓܵܘ ܛܝܼܢܵܐ. ܟܸܐ ܗܵܘܝܵܐ ܦܲܓ̣ܪܵܢܵܐܝܼܬ ܡܲܣܚܘܼܝܘܼܗܝ ܚܲܕ ܚܙܘܼܪܵܐ ܐܝܼܢܵܐ ܠܸܐ ܗܵܘܝܵܐ ܫܲܚܠܘܼܦܸܐ ܠܟܝܵܢܸܗ. ܗܵܕܟ̣ܵܐ ܝܠܸܗ ܚܲܕ ܡܫܝܼܚܵܝܵܐ ܕܲܓܵܠܵܐ ܗ̇ܘ ܒܸܕ ܦܵܐܸܫ ܦܪܝܼܡܵܐ ܘܪܘܼܦܝܵܐ ܠܒ̣ܲܕܵܪ.

ܚܲܕܟܡܵܐ ܐ̄ܢܵܫܸܐ ܟܸܐ ܥܲܠܕܝܼ ܝܠܵܗ̇ ܓܵܢܵܝ ܩܵܐܕ ܒܸܕ ܦܵܝܫܝܼ ܦܪܝܼܩܸܐ. ܐܲܢܸܐ ܟܸܐ ܚܵܫܒ̣ܝܼ ܒܲܣܵܐ ܝܠܵܗ̇ ܕܗܵܘܸܐܠܲܢ ܗܲܝܡܵܢܘܼܬܵܐ ܟܠ ܡܸܢܕܝܼ ܕܒܵܥܝܲܚ ܟܸܐ ܡܵܨܲܚ ܕܥܵܒ̣ܕܲܚ ܘܠܝܼܬ ܣܢܝܼܩܘܼܬܵܐ ܕܐܵܙܲܠ̄ܚ ܒܵܬ̄ܪ ܡܫܝܼܚܵܐ. ܘܚܲܕܟܡܵܐ ܙܸܐ ܟܸܐ ܚܵܫܒ̣ܝܼ ܒܥܒ̣ܵܕܬܵܐ ܫܘܼܓ̣ܠܵܢܸܐ ܓܘܼܪܸܐ ܘܥܲܓ̰ܸܒܘܵܬܸܐ ܘܡܲܚܙܵܝܬܵܐ ܕܓܵܢܵܐ ܒܸܕ ܦܵܝܫܝܼ ܦܪܝܼܩܸܐ. ܡܫܝܼܚܵܐ ܒܸܐܡܵܪܵܐ ܝܠܸܗ ܕܬܸܪܘܵܝ ܐܲܢܸܐ ܒܸܚܠܵܛܵܐ ܝܢܵܐ ܘܒܸܕ ܢܵܦܠܝܼ ܓܵܘ ܓܸܗܲܢܵܐ.

ܣܵܒܵܒ ܩܵܐ ܩܲܒܲܠܬܵܐ ܕܦܘܼܪܩܵܢܵܐ ܠܵܐܙܸܡ ܗܲܝܡܵܢܘܼܬܵܐ ܥܲܡ ܦܸܠܚܵܢܸܐ ܛܵܒ̣ܸܐ ܗܵܘܝܼ ܥܲܡ ܐܘܼܕܵܠܸܐ. ܥܒ̣ܵܕܬܵܐ ܕܫܘܼܓ̣ܠܵܢܸܐ ܛܵܒ̣ܸܐ ܝܼܠܵܗ̇ ܢܝܼܫܵܢܩܵܐ ܕܗܲܝܡܵܢܘܼܬܵܐ ܘܗܲܝܡܵܢܘܼܬܵܐ ܕܘܼܙ ܟܸܐ ܡܲܥܒ̣ܸܕܵܐ ܫܘܼܓ̣ܠܵܢܸܐ ܫܲܦܝܼܪܸܐ. ܒܲܤ ܗܸܝܟ̰ ܥܕܵܢܵܐ ܠܸܐ ܡܵܨܲܚ ܦܵܪܫܲܚ ܠܵܗ̇ ܗܲܝܡܵܢܘܼܬܵܐ ܡ̣ܢ ܦܸܠܚܵܢܵܐ. ܝܵܥܢܸܐ ܗܲܝܡܵܢܘܼܬܵܐ ܕܠܵܐ ܦܘܼܠܚܵܢܸܐ ܡܝܼܬܬܵܐ ܝܠܵܗ̇. ܘܕܠܵܐ ܗܲܝܡܵܢܘܼܬܵܐ ܒܲܪܢܵܫܵܐ ܦܲܓ̣ܪܵܢܵܝܵܐ ܠܸܐ ܡܵܨܸܐ ܕܬܲܡܸܡ ܨܸܒ̣ܝܵܢܵܐ ܕܐܲܠܵܗܵܐ.

ܒܘܼܬ ܐܵܗܵܐ ܟܠ ܚܲܕ ܐ̄ܢܵܫܵܐ ܠܵܐܙܸܡ ܕܨܲܚܨܝܼܠܵܗ ܓܵܢܸܗ ܘܚܵܙܸܐ ܕܚܲܝܘܼܬܸܗ ܥܲܠ ܡܘܼܕܝܼ ܦܝܼܫܬܵܐ ܝܠܵܗ̇ ܒܢܝܼܬܵܐ ܘܝܵܕܥܲܚ ܐܸܢ ܟܠܵܗ̇ ܗܸܒ̣ܝܼܲܢ ܘܬܲܚܡܲܢܬܲܢ ܝܼܠܵܗ̇ ܥܲܠ ܦܲܓ̣ܪܲܢ ܘܡܸܢܕܝܼܵܢܸܐ ܥܵܒ̣ܪܵܢܸܐ ܕܐܵܗܵܐ ܕܘܼܢܝܸܐ ܒܲܝܬܵܐ ܕܚܲܝܘܼܬܲܢ ܒܸܢܝܘܼܗܝ ܝܘܲܚ ܥܲܠ ܣܸܠܵܐ. ܐܝܼܢܵܐ ܐܸܢ ܗܸܒ̣ܝܼܲܢ ܘܬܲܚܡܲܢܬܲܢ ܝܼܠܵܗ̇ ܩܵܐ ܝܕܸܥܬܵܐ ܘܬܦܵܩܬܵܐ ܒܸܡܫܝܼܚܵܐ ܒܲܝܬܵܐ ܕܚܲܝܘܼܬܲܢ ܒܸܢܝܘܼܗܝ ܝܘܲܚ ܥܲܠ ܩܵܝܵܐ.

ܓ̰ܘܼܪܵܒܸܐ ܘܩܲܘܲܡܝܵܬܸܐ ܓܵܘ ܚܲܝܘܼܬܵܐ ܕܚܲܕ ܐ̄ܢܵܫܵܐ ܒܸܕ ܡܲܚܙܝܼ ܕܵܐܟ̣ܝܼ ܡܫܝܼܚܵܝܵܐ ܝܠܸܗ. ܣܵܒܵܒ ܓ̰ܘܼܪܵܒܸܐ ܒܸܕ ܬܵܦܩܝܼ ܓܵܘ ܚܲܝܘܼܬܵܐ ܕܟܠ ܚܲܕ ܐ̄ܢܵܫܵܐ ܘܐܵܗܵܐ ܡܸܢܕܝܼ ܝܼܠܸܗ ܩܵܐ ܡܲܩܘܵܝܬܵܐ ܕܗܲܝܡܵܢܘܼܬܵܐ. ܓ̰ܘܼܪܵܒܸܐ ܡܘܼܕܟ̣ܼܪܸܐ ܠܲܐܟ̣ܵܐ ܐܲܝܟ̣ ܡܸܛܪܵܐ ܝܼܢܵܐ ܢܝܼܫܵܢܩܵܐ ܕܟ̰ܲܬܘܼܢܝܵܬܸܐ ܦܪܝܼܫܸܐ ܕܚܲܝܘܼܬܵܐ ܐܲܝܟ̣ ܛܠܘܼܡܝܸܐ ܘܡܸܣܟܸܢܘܼܬܵܐ ܘܚܘܼܠܡܵܢܵܐ ܕܦܲܓ̣ܪܵܐ ܘܡܵܘܬܵܐ ܩܵܐܕ ܡ̣ܢ ܥܒ̣ܲܕܵܪ ܟܸܐ ܬܵܦܩܝܼ ܒܐ̄ܢܵܫܵܐ.

ܡܵܡܘܿܠܵܐ (ܣܵܝܠ) ܝܼܠܸܗ ܢܝܼܫܵܢܩܵܐ ܕܝܘܼܐܵܒ̣ܸܐ (ܡܵܝܠܸܐ) ܘܫܘܼܒ̣ܗܵܪܵܐ ܕܒܸܦܠܵܛܵܐ ܝܢܵܐ ܡ̣ܢ ܓܵܘܲܢ. ܣܵܛܵܢܵܐ ܒܝܼ ܐܲܢܸܐ ܓ̰ܘܼܪܵܒܸܐ ܡ̣ܢ ܓܵܘܵܐ ܘܡ̣ܢ ܥܒ̣ܲܕܵܪ ܡܲܥܒ̣ܘܼܕܸܐ ܝܠܸܗ ܕܚܲܕ ܐ̄ܢܵܫܵܐ ܦܵܐܸܫ ܓ̰ܘܼܪܒܵܐ ܩܵܐܕ ܡܲܢܫܸܐ ܠܐܲܠܵܗܵܐ ܘܡܲܚܸܒ ܠܐܵܗܵܐ ܕܘܼܢܝܸܐ. ܦܵܘܚܵܐ ܝܼܠܸܗ ܢܝܼܫܵܢܩܵܐ ܕܓܵܢܘܼܗܝ ܣܵܛܵܢܵܐ ܩܵܐܕ ܒܝܼ ܡܸܨܥܵܝܘܼܬܵܐ ܕܫܝܼܟܘܼܬܵܐ ܘܙܕܘܼܥܬܵܐ ܘܒܗܸܒ̣ܝܼܘܼܬܵܐ ܟܸܐ ܐܵܬܸܐ ܠܓܸܒ ܐ̄ܢܵܫܵܐ.

ܐܲܢܸܐ ܝܢܵܐ ܐܵܢ ܓܸܐܪܸܐ ܕܢܘܼܪܵܐ ܕܝܼܠܸܗ ܡܵܪܝ ܦܵܘܠܘܼܤ ܬܲܢܘܼܝܸܐ ܒܘܼܬ ܕܝܼܵܝ ܓܵܘ ܐܸܓܲܪܬܘܼܗܝ ܩܵܐ ܐܵܦܸܣܵܝܸܐ. ܒܲܤ ܟ̰ܲܠܸܫܲܚ ܕܗܵܘܲܚ ܡܫܝܼܚܵܝܸܐ ܫܲܪܝܼܪܸܐ ܡܲܚܸܒܲܚ ܘܐܵܙܲܠ̄ܚ ܒܵܬ̄ܪܘܼܗܝ ܘܫܵܡܥܲܚ ܠܗܸܡܸܙܡܵܢܘܼܗܝ ܘܬܲܡܸܡܲܚ ܠܗ̄ܘܿܢ ܒܝܼ ܦܸܠܚܵܢܲܢ ܣܵܒܵܒ ܐܲܚܟ̰ܝܼ ܚܕܵܐ ܒܸܢܝܲܬ (ܫܲܬܐܸܣܬܵܐ) ܩܘܝܼܬܵܐ ܘܫܲܪܝܼܪܬܵܐ ܐܝܼܬ ܩܵܐ ܚܲܝܘܼܬܵܐ ܕܒܲܪܢܵܫܵܐ ܗ̇ܝ ܙܸܐ ܝܼܠܸܗ ܓܵܢܘܼܗܝ ܝܼܫܘܿܥ ܡܫܝܼܚܵܐ. ܐܡܝܢ .

ܦܘܫܩܐ ܡ̣ܢ ܩܫ.ܬܐܘܡܐ ܫܝܼܢܘ