ܓܵܘ ܐܸܘܲܢܓܵܠܝܼܘܿܢ ܕܐܸܕܝܵܘܡ ܒܸܚܙܵܝܵܐ ܝܘܲܚ ܩܵܐܕ ܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܬܲܠܡܝܼܕܘܼܗܝ ܒܸܥܒܵܕܵܐ ܝܢܵܐ ܚܙܘܼܩܝܵܐ (ܣܵܦ̮ܵܪ) ܠܐܘܿܪܸܫܠܸܡ. ܡܫܝܼܚܵܐ ܩܵܐ ܓܵܗܸܐ ܕܬܠܵܬܵܐ ܒܸܐܡܵܪܵܐ ܝܠܸܗ ܩܵܬܵܝ ܩܵܐܕ ܓܘܼܪܵܢܸܐ ܘܟܵܗܢܸܐ ܘܣܵܦܪܸܐ ܒܸܕ ܣܲܦܝܼܠܸܗ ܒܐܝܼܕܵܐ ܛܵܝܸܦܸܐ ܝܵܥܢܸܐ ܪܗܘܿܡܵܝܸܐ ܘܒܸܕ ܓ̰ܲܢܓ̰ܸܪܝܼ ܠܸܗ ܘܡܵܚܝܼ ܠܸܗ ܠܙܩܝܼܦܵܐ. ܐܵܦܸܢ ܡܫܝܼܚܵܐ ܐܵܗܵܐ ܫܲܪܒܵܐ (ܡܵܬܠܵܒ) ܬܠܵܬܵܐ ܓܵܗܵܐ ܬܘܼܢܝܘܿܗ ܗܘܵܐ ܩܵܬܵܝ ܐܝܼܢܵܐ ܐܵܢܝܼ ܠܸܐܗܘܵܘ ܒܝܼܕܵܥܵܐ ܕܗ̇ܘ ܒܘܼܬ ܡܘܿܕܝܼ ܗܲܡܙܘܼܡܸܐ ܝܠܸܗ.

ܡ̣ܢ ܒܵܬ̄ܪ ܕܐܵܗܵܐ ܗܲܡܙܲܡܬܵܐ ܐܬܸܐܠܵܗ̇ ܠܟܸܣܠܸܗ ܝܸܡܵܐ ܕܬܪܸܝܢ ܡ̣ܢ ܬܲܠܡܝܼܕܸܐ ܝܲܥܩܘܿܒ ܘܝܘܼܚܲܢܵܢ ܘܛܠܸܒܠܵܗ̇ ܡܸܢܸܗ ܘܐܵܡܪܵܐ ܕܝܲܗܒ̣ܸܬ ܚܲܕ ܕܲܪܓ̣ܵܐ ܝܲܢ ܕܘܼܟܬܵܐ ܥܸܠܵܝܬܵܐ ܩܵܐ ܐܲܢܸܐ ܬܪܸܝܢ ܒܢܘܿܢܝܼ ܓܵܘ ܡܲܠܟܘܼܬܘܼܟ̣.

ܐܲܝܟ̣ ܕܡܲܒܝܘܼܢܸܐ ܝܠܵܗ̇ ܕܐܵܢܝܼ ܬܲܚܡܘܼܢܸܐ ܗܘܵܘ ܒܘܼܬ ܡܲܠܟܘܼܬܵܐ ܐܲܪܥܵܢܵܝܬܵܐ. ܒܝܼܕܵܥܵܐ ܝܘܲܚ ܕܡܫܝܼܚܵܐ ܪܵܒܵܐ ܓܵܗܸܐ ܐ̄ܡܝܼܪܵܐ ܗܘܵܐ ܩܵܬܵܝ ܕܠܵܐ ܟ̰ܲܠܸܫܝܼ ܕܗܵܘܝܼ ܩܲܕܡܵܝܸܐ ܒܡܸܢܕܝܼܵܢܸܐ ܥܵܒ̣ܪܵܢܸܐ ܕܐܵܗܵܐ ܕܘܼܢܝܸܐ. ܐܝܼܢܵܐ ܒܸܚܙܵܝܵܐ ܝܘܲܚ ܕܐܵܗܵܐ ܬܲܚܡܲܢܬܵܐ ܐܝܼܬ ܗܘܵܐ ܒܸܝܠ ܬܲܠܡܝܼܕܸܐ.

ܒܘܼܬ ܕܐܵܗܵܐ ܡܫܝܼܚܵܐ ܒܸܐܡܵܪܵܐ ܝܠܸܗ ܠܸܐ ܝܬܘܿܢ ܒܝܼܕܵܥܵܐ ܡܘܿܕܝܼ ܒܸܛܠܵܒܵܐ ܝܬܘܿܢ ܡܵܨܝܼܬܘܿܢ ܠܸܫܬܵܝܵܐ ܟܵܣܵܐ ܕܐܵܢܵܐ ܗܕܝܼܪܵܐ ܝܘܸܢ ܠܸܫܬܵܝܵܐ ܘܡܲܥܡܘܿܕܝܼܬܵܐ ܕܐܵܢܵܐ ܥܵܡܕܸܢ ܒܸܕ ܥܵܡܕܝܼܬܘܿܢ. ܠܲܐܟ̣ܵܐ ܫܬܵܝܵܐ ܕܟܵܣܵܐ ܣܘܼܟܵܠܘܿܗ̇ ܝܼܠܸܗ ܩܲܒܲܠܬܵܐ ܕܚܲܫܵܐ ܘܡܲܥܡܘܿܕܝܼܬܵܐ ܝܼܠܵܗ̇ ܢܝܼܫܵܢܩܵܐ ܕܡܵܘܬܵܐ. ܡܫܝܼܚܵܐ ܐܬܸܠܸܗ ܕܠܵܐ ܐܲܚܟ̰ܝܼ ܓ̰ܲܢܓ̰ܸܪ ܘܩܲܒܸܠ ܚܲܫܵܐ ܐܸܠܵܐ ܕܡܵܐܸܬ ܡ̣ܢ ܓܸܒܵܐ ܕܟܠܲܝ ܒܢܲܝܢܵܫܵܐ. ܐܲܢܸܐ ܬܪܸܝܢ ܬܲܠܡܝܼܕܸܐ ܒܗ̇ܝ ܥܕܵܢܵܐ ܠܸܐ ܗܘܵܘ ܒܝܼܕܵܥܵܐ ܡܘܿܕܝܼ ܒܸܛܠܵܒܵܐ ܝܢܵܐ.

ܡܫܝܼܚܵܐ ܓܵܢܘܼܗܝ ܒܝܼܕܵܥܵܐ ܗܘܵܐ ܩܵܐܕ ܐܵܢܝܼ ܒܕܲܥܬܝܼܕ ܒܕ ܩܲܒܠܝܼ ܚܲܫܵܐ ܓ̰ܘܼܢܓ̰ܵܪܸܐ ܘܐܘܼܦ ܒܸܕ ܡܵܝܬܝܼ ܠܐܘܼܪܚܵܐ ܕܝܼܘܼܗܝ. ܐܲܠܵܗܵܐ ܒܓܵܢܘܼܗܝ ܕܠܵܐ ܫܢܘܼܙܝܵܐ (ܬܵܦ̮ܵܒ̣ܘܼܕ) ܩܵܐ ܟܠ ܐ̄ܢܵܫܵܐ ܚܕܵܐ ܕܘܼܟܬܵܐ ܦܪܝܼܫܬܵܐ ܒܕ ܝܲܗܒ̣ܸܠ ܓܵܘ ܡܲܠܟܘܼܬܵܐ ܘܐܵܗܵܐ ܫܘܼܓ̣ܠܵܐ ܒܸܕ ܥܵܒ̣ܸܕ ܠܸܗ ܒܸܟܝܘܼܠܵܐ (ܐܵܢܕܵܙܵܐ) ܕܗܲܝܡܵܢܘܼܬܵܐ ܘܚܘܼܒܵܐ ܕܟܠ ܐ̄ܢܵܫܵܐ ܕܐܝܼܬܠܸܗ ܩܵܐ ܐܲܠܵܗܵܐ.

ܡܫܝܼܚܵܐ ܡܲܠܘܼܦܸܐ ܝܠܸܗ ܩܵܐ ܬܲܠܡܝܼܕܘܼܗܝ ܕܠܵܐ ܦܵܝܫܝܼ ܕܘܼܡܝܸܐ ܥܲܠ ܐ̄ܢܵܫܸ̈ܐ ܕܐܵܗܵܐ ܥܵܠܡܵܐ ܣܵܒܵܒ ܐܵܢܝܼ ܡܲܚܘܼܒܸܐ ܝܢܵܐ ܕܗܵܘܝܼ ܩܲܕܡܵܝܸܐ ܘܚܲܝܠܵܢܸܐ ܒܘܼܬ ܝܘܼܬܪܵܢܵܐ ܕܓܵܢܵܝ ܘܐܝܼܡܲܢ ܕܗܘܸܠܗܘܿܢ ܩܲܕܡܵܝܸܐ ܒܸܕ ܗܲܟܡܝܼ ܘܙܵܠܡܝܼ ܠܐܚܸܪܢܸܐ.

ܐܝܼܢܵܐ ܬܲܠܡܝܼܕܵܐ ܕܡܫܝܼܚܵܐ ܠܵܐ ܓܵܪܵܓ ܗܵܘܝܼ ܗܵܕܟ̣ܵܐ ܐܸܠܵܐ ܗܵܘܝܼ ܡܫܲܡܫܵܢܸܐ (ܚܸܕܡܵܬܟܵܪ) ܕܐܚܸܪܢܸܐ. ܣܵܒܵܒ ܓܵܘ ܡܫܝܼܚܵܝܸܐ ܚܲܕ ܡܗܲܕܝܵܢܵܐ ܫܲܪܝܼܪܵܐ ܗ̇ܘ ܝܼܠܸܗ ܕܒܸܥܒ̣ܵܕܵܐ ܚܸܕܡܵܬ ܩܵܐ ܐܚܸܪܢܸܐ. ܡܲܚܲܒܬܵܐ ܕܪܸܫܵܢܘܼܬܵܐ ܓܵܘ ܥܸܕܬܵܐ ܠܸܐ ܝܠܵܗ̇ ܚܛܝܼܬܵܐ ܣܵܒܵܒ ܚܛܝܼܬܵܐ ܗ̇ܝ ܥܕܵܢܵܐ ܝܠܵܗ̇ ܕܚܲܕ ܐ̄ܢܵܫܵܐ ܡܲܚܘܼܒܸܐ ܝܠܸܗ ܗܵܘܸܐ ܓܘܼܪܵܐ ܩܵܐܕ ܕܗܲܟܸܡ ܘܙܵܠܸܡ ܥܲܠ ܐܚܸܪܢܸܐ ܒܸܚܙܵܝܵܐ ܝܘܲܚ ܡܫܝܼܚܵܐ ܕܵܐܟ̣ܝܼ ܦܲܫܘܼܩܘܿܗ̇ ܝܠܸܗ ܥܸܠܬܵܐ ܕܐܬܵܝܬܸܗ ܠܐܵܗܵܐ ܕܘܼܢܝܸܐ ܘܒܸܐܡܵܪܵܐ ܝܠܸܗ ܒܪܘܿܢܵܐ ܕܐ̄ܢܵܫܵܐ ܝܵܥܢܸܐ ܒܪܘܿܢܵܐ ܕܐܲܠܵܗܵܐ ܠܵܐ ܐܬܸܐܠܸܗ ܕܥܵܒ̣ܕܝܼܠܸܗ ܚܸܠܡܲܬ ܐܸܠܵܐ ܕܗ̇ܘ ܥܵܒ̣ܸܕ ܚܸܠܡܲܬ ܩܵܐ ܐ̄ܢܵܫܸܐ ܒܲܤ ܗ̇ܘ ܐܬܸܐܠܸܗ ܕܠܵܐ ܐܲܚܟ̰ܝܼ ܩܵܐܕ ܥܵܒ̣ܸܕ ܚܸܕܡܵܬ ܩܵܐ ܒܲܪܢܵܫܵܐ ܐܸܠܵܐ ܓܵܢܘܼܗܝ ܙܸܐ ܝܗܘܼܒ̣ܵܐ ܠܸܗ ܡ̣ܢ ܓܸܒܵܐ ܕܟܠܲܝ ܒܢܲܝܢܵܫܵܐ. ܐܡܝܢ .

ܦܘܫܩܐ ܡ̣ܢ ܩܫ.ܬܐܘܡܐ ܫܝܼܢܘ