ܝܼܫܘܿܥ ܡܫܝܼܚܵܐ ܗܲܩܘܼܝܸܐ ܝܠܸܗ ܐܵܗܵܐ ܡܵܣܵܠܵܐ ܩܵܐ ܓܘܼܪܵܢܸܐ ܕܝܗܘܼܕܵܝܸܐ ܐܵܢܝܼ ܕܟܸܐ ܚܵܫܒ̣ܝܼ ܗܘܵܘ ܒܸܢܛܵܪܘܿܗ̇ ܝܢܵܐ ܫܲܪܥܵܬ (ܢܵܡܘܿܣܵܐ) ܕܐܲܠܵܗܵܐ ܘܒܝܼ ܕܵܐܗܵܐ ܡܸܢܕܝܼ ܟܸܐ ܥܵܒ̣ܕܝܼ ܗܘܵܘ ܫܘܼܒ̣ܗܵܪܵܐ. ܠܐܲܟ̣ܵܐ ܒܪܘܿܢܵܐ ܩܲܕܡܵܝܵܐ ܢܝܼܫܵܢܩܵܐ ܝܠܸܗ ܕܕܲܡܓ̣ܵܟ̰ܝܼܸܐ ܘܙܵܢܝܵܬܸܐ ܐܵܢܝܼ ܕܓܵܢܵܝ ܠܸܐ ܗܘܵܘ ܒܝܼܕܵܥܘܿܗ̇ ܐ̄ܢܵܫܸܐ ܟܸܐܢܸܐ ܐܲܝܟ̣ ܡܵܪܝ ܦܲܛܪܘܿܤ ܫܠܝܼܚܵܐ ܕܐ̄ܡܸܪܸܗ ܩܵܐ ܡܫܝܼܚܵܐ ܪܚܘܿܩ ܡܸܢܝܼ ܝܵܐ ܡܵܪܝܼ ܒܗ̇ܝ ܐ̄ܢܵܫܵܐ ܝܘܸܢ ܚܲܛܵܝܵܐ.

ܗܵܕܟ̣ܵܐ ܐ̄ܢܵܫܸܐ ܠܸܐ ܝܢܵܐ ܩܲܒܘܼܠܸܐ ܕܚܲܕ ܝܵܘܡܵܐ ܒܸܕ ܗܵܘܝܼ ܐ̄ܢܵܫܸܐ ܪܘܼܚܵܢܵܝܸܐ ܒܘܼܬ ܕܐܵܗܵܐ ܒܸܥܪܵܩܵܐ ܝܢܵܐ ܡ̣ܢ ܡܫܝܼܚܵܐ ܐܝܼܢܵܐ ܒܗ̇ܝ ܐ̄ܚܵܪܬܵܐ ܒܸܪܥܵܫܵܐ ܝܢܵܐ ܕܚܲܛܵܝܸܐ ܝܢܵܐ ܘܬܲܘܘܼܒܸܐ ܝܢܵܐ ܘܗܲܡܘܼܢܸܐ ܒܐܲܠܵܗܵܐ ܘܦܝܵܫܵܐ ܝܢܵܐ ܩܒܝܼܠܸܐ ܘܗܘܵܝܵܐ ܝܢܵܐ ܟܸܐܢܸܐ. ܒܪܘܿܢܵܐ ܕܬܪܸܝܢ ܛܘܼܦ̮ܣܵܐ ܝܠܸܗ ܕܓܘܼܪܵܢܸܐ ܡܲܙܗܵܒܵܝܸܐ ܕܝܗܘܼܕܵܝܸܐ ܕܟܸܐ ܚܵܫܒ̣ܝܼ ܗܘܵܘ ܕܐ̄ܢܵܫܸܐ ܟܸܐܢܸܐ ܝܢܵܐ ܘܢܵܛܪܵܢܸܐ ܕܦܘܼܩܕܵܢܵܐ ܕܐܲܠܵܗܵܐ ܐܝܼܢܵܐ ܡ̣ܢ ܠܸܒܵܐ ܪܸܚܩܵܐ ܗܘܵܘ ܡ̣ܢ ܐܲܠܵܗܵܐ. ܝܘܼܚܲܢܵܢ ܡܲܥܡܸܕܵܢܵܐ ܬܲܢܘܼܝܸܐ ܝܠܸܗ ܩܵܬܵܝ ܠܲܐܙܸܡ ܝܠܵܗ̇ ܕܕܵܝܪܝܼ ܘܬܲܘܸܒܝܼ ܐܝܼܢܵܐ ܐܵܢܝܼ ܠܵܐ ܫܡܸܥܠܗܘܿܢ ܐܸܠܸܗ ܐܘܼܦ ܙܸܐ ܠܵܐ ܗܘܼܡܸܢܘܿܢ ܒܝܼܫܘܿܥ ܡܫܝܼܚܵܐ.

ܡܫܝܼܚܵܐ ܒܸܐܡܵܪܵܐ ܝܠܸܗ ܩܵܬܵܝ ܕܐ̄ܢܵܫܸܐ ܚܲܛܵܝܸܐ ܐܲܝܟ̣ ܕܲܡܓ̣ܵܟ̰ܝܼܸܐ ܘܙܵܢܵܝܸܐ ܬܘܼܘܸܒܠܗܘܿܢ ܘܡ̣ܢ ܩܵܕ̄ܡ ܕܝܼܵܝ ܒܸܕ ܥܵܒ̣ܪܝܼ ܠܡܲܠܟܘܼܬܵܐ ܕܐܲܠܵܗܵܐ. ܗܵܕܟ̣ܵܐ ܕܩܲܕܡܵܝܸܐ ܒܸܕ ܗܵܘܝܼ ܐ̄ܚܵܪܵܝܸܐ. ܐܘܼܦ ܙܸܐ ܚܲܕܟܡܵܐ ܓܵܗܸܐ ܒܸܚܙܵܝܵܐ ܝܘܲܚ ܐܵܢ ܐ̄ܢܵܫܸܐ ܕܐ̄ܚܵܪܵܝܬܵܐ ܕܚܲܝܵܝ ܗܘܼܡܸܢܘܿܢ ܒܝܼܫܘܿܥ ܡܫܝܼܚܵܐ ܒܘܼܫ ܙܵܘܕܵܐ ܩܲܒܘܼܠܸܐ ܝܢܵܐ ܫܵܦܵܩܵܬ ܕܐܲܠܵܗܵܐ ܡ̣ܢ ܕܵܐܢܝܼ ܕܒܫܘܼܪܵܝܵܐ ܕܚܲܝܵܝ ܗܘܼܡܸܢܸܐ ܗܘܵܘ.

ܐܘܼܦ ܙܸܐ ܡܲܒܝܘܼܢܸܐ ܝܠܵܗ̇ ܐܵܢܝܼ ܕܪܵܒܵܐ ܟ̰ܲܠܘܼܫܸܐ ܝܢܵܐ ܕܗܵܘܝܼ ܩܲܕܡܵܝܸܐ ܒܸܦܪܵܩܬܵܐ ܒܗܘܵܝܵܐ ܝܢܵܐ ܐ̄ܚܵܪܵܝܸܐ ܘܐܵܢܝܼ ܕܐܲܚܟ̰ܝܼ ܥܲܠ ܓܵܢܵܝ ܒܸܣܢܵܕܵܐ ܝܢܵܐ ܗܘܵܝܵܐ ܝܢܵܐ ܐ̄ܚܵܪܵܝܸܐ ܐܝܼܢܵܐ ܐܵܢܝܼ ܕܫܲܟܘܼܪܸܐ ܝܢܵܐ ܠܐܲܠܵܗܵܐ ܗܘܵܝܵܐ ܝܢܵܐ ܩܲܕܡܵܝܸܐ ܘܐܵܢܝܼ ܕܛܲܪܛܘܼܡܸܐ ܘܒܲܚܘܼܠܸܐ ܝܢܵܐ ܒܸܕ ܗܵܘܝܼ ܐ̄ܚܵܪܵܝܸܐ. ܡܫܝܼܚܵܐ ܒܓܵܢܘܼܗܝ ܡܘܼܠܸܦܠܸܗ ܩܵܐ ܬܲܠܡܝܼܕܘܼܗܝ ܕܠܵܐ ܬܲܚܡܸܢܝܼ ܕܗܵܘܝܼ ܩܲܕܡܵܝܸܐ.

ܐܲܚܢܲܢ ܙܸܐ ܠܵܐ ܥܵܒ̣ܕܲܚ ܡܲܡܠܵܐ ܡ̣ܢ ܐܲܠܵܗܵܐ ܝܵܥܢܸܐ ܐܝܼܡܲܢ ܕܚܲܕ ܫܘܼܓ̣ܠܵܐ ܒܸܥܒ̣ܵܕܵܐ ܝܘܲܚ ܠܵܐ ܗܘܸܐܠܲܢ ܣܒܵܪܬܵܐ ܩܵܐܕ ܡ̣ܢ ܐܲܠܵܗܵܐ ܙܸܕܩܲܢ ܦܵܐܸܫ ܦܪܝܼܥܵܐ. ܣܵܒܵܒ ܗ̇ܘ ܒܗ̇ܘ ܟܝܘܼܠܵܐ ܕܬܲܚܡܲܢܬܲܢ ܠܸܐ ܦܵܪܥܝܼ ܠܸܗ ܗܵܩܲܢ. ܣܵܒܵܒ ܐܵܢܝܼ ܕܟܸܐ ܚܵܫܒܝܼ ܕܚܫܝܼܚܸܐ ܝܢܵܐ ܕܗܵܘܝܼ ܩܲܕܡܵܝܸܐ ܒܸܕ ܗܵܘܝܼ ܐ̄ܚܵܪܵܝܸܐ ܐܝܼܢܵܐ ܐܵܢܝܼ ܕܟܸܐ ܚܵܫܒܝܼ ܠܵܗ̇ ܓܵܢܵܝ ܐ̄ܚܵܪܵܝܸܐ ܒܸܕ ܗܵܘܝܼ ܩܲܕܡܵܝܸܐ.

ܐܲܠܵܗܵܐ ܟܸܐ ܡܲܪܸܡ ܠܐ̄ܢܵܫܸܐ ܡܲܟܝܼܟ̣ܸܐ ܘܟܸܐ ܡܲܟܸܦ ܠܐ̄ܢܵܫܸܐ ܪܵܡܵܢܸܐ. ܒܲܤ ܟܠ ܚܲܕ ܡܗܘܼܡܢܵܐ ܠܲܐܙܸܡ ܝܠܵܗ̇ ܕܐܵܙܸܠ ܒܵܬ̄ܪ ܡܫܝܼܚܵܐ ܘܬܲܡܸܡ ܦܘܼܩܕܵܢܘܼܗܝ ܗ̇ܘ ܒܸܕ ܝܲܗܒ̣ܸܠܠܸܗ ܚܲܕ ܣܲܗܡܵܐ ܕܗܘܼܕܪܵܐ ܝܠܸܗ ܩܵܬܘܼܗܝ. ܐܸܢ ܨܦܵܝܝܼ ܓܲܫܩܲܚ ܓܵܘ ܐܵܗܵܐ ܗܲܩܝܲܬ ܒܸܕ ܚܵܙܲܚ ܩܵܐܕ ܫܘܼܓ̣ܠܵܐ ܕܥܒ̣ܸܕܠܗܘܿܢ ܐܲܢܸܐ ܬܸܪܝܢ ܝܵܠܸܐ ܚܸܠܛܵܐ ܗܘܵܐ ܝܵܥܢܸܐ ܚܸܠܛܵܐ ܕܗ̇ܘ ܩܲܕܡܵܝܵܐ ܝܼܗܘܵܐ ܒܗܸܡܸܙܡܵܢ ܘܚܸܠܛܵܐ ܕܗ̇ܘ ܕܬܸܪܝܢ ܒܝܼ ܦܸܠܚܵܢܵܐ ܒܲܤ ܐܲܠܵܗܵܐ ܠܸܐ ܓܲܫܸܩ ܥܲܠ ܗܸܡܸܙܡܵܢ ܐܸܠܵܐ ܥܲܠ ܦܸܠܚܵܢܵܐ ܕܐ̄ܢܵܫܵܐ.

ܐܵܕܝܼܵܐ ܕܡܸܛܝܸܐ ܝܘܲܚ ܠܦܲܠܓܘܼܬܵܐ ܕܨܵܘܡܵܐ ܓܘܼܪܵܐ ܟܠ ܚܲܕ ܐ̄ܢܵܫܵܐ ܟ̰ܲܠܸܫ ܕܕܵܐܸܪ ܘܨܲܚܨܝܼܠܵܗ̇ ܓܵܢܸܗ ܘܚܵܙܸܐ ܕܡܘܼܕܝܼ ܥܒ̣ܝܼܕܵܐ ܝܠܸܗ ܓܵܘ ܐܵܗܵܐ ܡܸܬܚܵܐ ܟ̰ܘܠܸܫܵܐ ܝܠܸܗ ܕܡܲܒܣܸܪ ܡ̣ܢ ܚܛܝܼܵܬܸܗ ܝܲܢ ܒܘܼܫ ܡܘܼܙܝܸܕܵܐ ܝܠܸܗ ܥܲܠܲܝ ܕܵܐܟ̣ܝܼ ܕܓܵܘ ܚܕܵܐ ܡ̣ܢ ܨܠܵܘܵܬܸܐ ܛܲܟ̣ܣܲܢ ܒܸܐܡܵܪܵܐ ܝܠܸܗ. ܡܫܝܼܚܵܐ ܕܝܗܘܼܒ̣ܸܠܸܗ ܚܲܝܠܵܐ ܘܗܘܼܝܸܪܠܸܗ ܩܵܬܲܢ ܕܡܵܛܲܚ ܠܦܲܠܓܘܼܬܵܐ ܕܨܵܘܡܵܐ ܗ̇ܘ ܗܲܝܸܪܠܲܢ ܒܝܼ ܫܵܦܵܩܵܬܘܼܗܝ ܘܚܲܠܥܲܬܸܗ ܩܵܐܕ ܡܵܨܲܚ ܦܲܓ̣ܪܵܢܵܐܝܼܬ ܘܪܘܼܚܵܢܵܐܝܼܬ ܡܵܛܲܚ ܠܦܪܵܩܬܵܐ ܕܨܵܘܡܵܐ. ܐܡܝܢ .

ܦܘܫܩܐ ܡ̣ܢ ܩܫ.ܬܐܘܡܐ ܫܝܼܢܘ