ܓܵܘ ܐܸܘܲܢܓܵܠܝܼܘܿܢ ܕܐܸܕܝܵܘܡ ܒܸܚܙܵܝܵܐ ܝܘܲܚ ܩܵܐܕ ܝܼܫܘܿܥ ܡܫܝܼܚܵܐ ܓܵܘ ܝܵܘܡܵܐ ܐ̄ܚܵܪܵܝܵܐ ܕܥܸܐܕܵܐ ܕܝܗܘܼܕܵܝܸܐ ܗܵܕܟ̣ܵܐ ܒܸܐܡܵܪܵܐ ܝܠܸܗ ܐܸܢ ܐ̄ܢܵܫܵܐ ܨܸܗܝܵܐ ܝܠܸܗ ܐܵܬܸܐ ܠܟܸܣܠܝܼ ܘܫܵܬܸܐ. ܡܵܪܝ ܦܵܘܠܘܿܤ ܫܠܝܼܚܵܐ ܓܵܘ ܐܸܓܲܪܬܵܐ ܩܵܐ ܩܘܿܪܸܢܬܵܝܸܐ ܡܲܕܟ̣ܘܼܪܸܐ ܝܠܸܗ ܗ̇ܝ ܥܕܵܢܵܐ ܕܛܵܝܸܦܵܐ ܕܝܗܘܼܕܵܝܸܐ ܒܚܵܝܵܐ ܗܘܵܘ ܒܒܲܪܝܼܵܐ ܕܣܝܼܢܲܝ ܬܲܡܵܐ ܡܘܼܫܬܝܼܵܝ ܝܠܸܗ ܡܝܼ̈ܵܐ ܓܵܢܵܝ ܘܩܸܢܝܵܢܵܝ ܡ̣ܢ ܕܗ̇ܘ ܩܵܝܵܐ ܕܟܸܐܦܵܐ ܘܗ̇ܘ ܩܵܝܵܐ ܝܼܗܘܵܐ ܢܝܼܫܵܢܩܵܐ ܕܝܼܫܘܿܥ ܡܫܝܼܚܵܐ. ܘܒܸܐܡܵܪܵܐ ܝܠܸܗ ܡܫܝܼܚܵܐ ܗܘܵܐ ܕܡܘܼܥܒ̣ܸܪܸܗ ܩܵܬܵܝ ܡ̣ܢ ܝܵܡܵܐ ܗ̇ܘ ܝܼܗܘܵܐ ܗ̇ܘ ܡܲܢܵܐ ܕܒܸܨܠܵܝܵܐ ܗܘܵܐ ܡ̣ܢ ܫܡܲܝܵܐ ܘܗ̇ܝ ܥܲܝܒ̣ܵܐ ܕܝܼܗܘܵܐ ܡܗܲܕܘܼܝܸܐ ܩܵܬܵܝ ܓܵܘ ܒܲܪܝܼܵܐ. ܒܲܤ ܡܫܝܼܚܵܐ ܝܼܠܸܗ ܡܲܒܘܼܥܵܐ ܕܟܠܲܝ ܒܘܼܪܟܵܬܸܐ.

ܩܵܐ ܩܲܒܲܠܬܵܐ ܕܡܝܼܵܐ ܕܚܲܝܸܐ ܐ̄ܢܵܫܵܐ ܠܲܐܙܸܡ ܗܵܘܸܐ ܨܸܗܝܵܐ ܕܟܸܐܢܘܼܬܵܐ ܘܚܲܝܸܐ ܪܘܼܚܵܢܵܝܸܐ ܐܝܼܢܵܐ ܒܸܚܙܵܝܵܐ ܝܘܲܚ ܕܒܢܲܝ ܥܵܠܡܵܐ ܗܘܵܝܵܐ ܝܢܵܐ ܨܸܗܝܸܐ ܘܟܦܝܼܢܸܐ ܕܬܵܗܵܪܸ̈ܐ ܕܒܘܼܣܵܡܸܐ ܘܛܵܒ̣ܘܼܬܵܐ (ܚܘܿܫܒܲܚܬܘܼܬܵܐ) ܕܐܵܗܵܐ ܕܘܼܢܝܸܐ ܐܝܼܢܵܐ ܗܸܝܟ̰ ܥܕܵܢܵܐ ܠܸܐ ܝܢܵܐ ܒܸܣܒ̣ܵܥܵܐ ܘܠܸܐ ܝܢܵܐ ܒܸܡܛܵܝܵܐ ܥܲܠܘܿܗ̇. ܐܝܼܢܵܐ ܐܸܢ ܩܲܕܡܵܝܬܵܐ ܛܵܠܸܒ ܟܸܐܢܘܼܬܵܐ ܒܸܕ ܡܲܫܟ̰ܸܟ̣ ܠܵܗ̇ ܐܘܼܦ ܛܵܒ̣ܘܼܬܵܐ. ܒܸܚܙܵܝܵܐ ܝܘܲܚ ܕܐ̄ܢܵܫܵܐ ܒܸܢܦܵܠܵܐ ܝܠܸܗ ܒܵܬ̄ܪ ܚܘܿܫܒܲܚܬܘܼܬܵܐ ܐܝܼܢܵܐ ܒܸܗܘܵܝܵܐ ܝܠܸܗ ܒܝܼܫ ܓܲܕܵܐ (ܒܵܕܒܵܚܬ) ܘܥܸܠܬܵܐ ܕܐܵܗܵܐ ܡܸܢܕܝܼ ܝܼܠܵܗ̇ ܚܛܝܼܬܵܐ.

ܩܵܐܕ ܗܵܘܸܐ ܚܸܐܪܵܐ (ܥܵܐܙܵܕ) ܡ̣ܢ ܒܵܕܒܵܚܬܘܼܬܵܐ ܠܲܐܙܸܡ ܗܵܘܸܐ ܚܸܐܪܵܐ ܡ̣ܢ ܚܛܝܼܬܵܐ ܝܵܥܢܸܐ ܗܵܘܸܐ ܟܸܐܢܵܐ ܕܵܐܟ̣ܝܼ ܕܡܫܝܼܚܵܐ ܐ̄ܡܸܪܸܗ ܒܥܸܝܡܘܿܢ ܩܲܕܡܵܝܬܵܐ ܟܸܐܢܘܼܬܵܐ ܒܸܕ ܡܲܫܟ̰ܚܝܼ ܝܬܘܿܢ ܚܸܕܝܘܼܬܵܐ ܘܫܠܵܡܵܐ ܘܪܘܼܚܵܢܵܝܘܼܬܵܐ ܘܟܠܲܝ ܒܘܼܪܟܵܬܸܐ ܐ̄ܚܸܪ̄ܢܸܐ. ܣܵܒܵܒ ܐ̄ܢܵܫܵܐ ܟܸܐܢܵܐ ܝܵܥܢܸܐ ܐ̄ܢܵܫܵܐ ܙܲܕܝܼܩܵܐ ܘܩܘܼܪܒܵܐ ܠܐܲܠܵܗܵܐ ܘܕܵܡܝܵܢܵܐ ܠܝܼܫܘܿܥ ܡܫܝܼܚܵܐ ܘܡܸܠܝܵܐ ܡ̣ܢ ܪܘܼܚܵܐ ܕܩܘܼܕܫܵܐ. ܒܲܤ ܩܵܐܕ ܐ̄ܢܵܫܵܐ ܗܵܘܸܐ ܟܸܐܢܵܐ ܠܲܐܙܸܡ ܗܵܘܸܐ ܚܸܐܪܵܐ ܡ̣ܢ ܚܛܝܼܬܵܐ ܒܗ̇ܝ ܕܚܛܝܼܬܵܐ ܒܸܟܠܵܝܵܐ ܝܠܵܗ̇ ܕܲܪܩܘܼܒ̣ܠ ܕܪܘܼܚܵܐ ܕܩܘܼܕܫܵܐ ܘܡܲܪܚܘܼܩܘܼܗܝ ܠܵܗ̇ ܒܲܪܢܵܫܵܐ ܡ̣ܢ ܐܲܠܵܗܵܐ.

ܐܸܢ ܐ̄ܢܵܫܵܐ ܚܲܕܟ̰ܵܐ ܗܵܘܸܐ ܟܦܝܼܢܵܐ ܐܲܠܵܗܵܐ ܙܸܐ ܚܲܕܟ̰ܵܐ ܒܸܕ ܝܲܗܒ̣ܸܠܸܗ ܘܐܸܢ ܪܵܒܵܐ ܗܵܘܸܐ ܟܦܝܼܢܵܐ ܗ̇ܘ ܙܸܐ ܪܵܒܵܐ ܒܸܕ ܝܲܗܒ̣ܸܠܸܗ. ܐ̄ܢܵܫܵܐ ܐܲܚܟ̰ܝܼ ܒܝܼ ܗܲܝܡܵܢܘܼܬܵܐ ܒܝܼܫܘܿܥ ܡܫܝܼܚܵܐ ܟܸܐ ܡܵܨܸܐ ܗܵܘܸܐ ܟܸܐܢܵܐ ܣܵܒܵܒ ܕܠܲܝܬ ܡܘܼܡܟܸܢܘܼܬܵܐ ܕܩܲܒܸܠ ܦܘܼܪܩܵܢܵܐ ܘܗܵܘܸܐ ܟܸܐܢܵܐ ܒܚܲܝܠܵܐ ܘܦܘܼܠܚܵܢܵܐ ܕܓܵܢܘܼܗܝ.

ܕܘܼܢܝܸܐ ܕܒܚܵܝܵܐ ܝܘܲܚ ܒܓܵܘܘ̇ܗ̇ ܒܸܕܡܵܝܵܐ ܝܠܵܗ̇ ܥܲܠ ܚܕܵܐ ܒܲܪܝܼܵܐ ܒܲܪܘܼܙܬܵܐ ܘܕܠܵܐ ܩܝܼܢܘܼܬܵܐ ܘܚܲܝܘܼܬܵܐ ܣܵܒܵܒ ܩܵܐ ܗܘܵܝܬܵܐ ܕܩܝܼܢܘܼܬܵܐ ܘܚܲܝܘܼܬܵܐ ܣܢܝܼܩܬܵܐ ܝܠܵܗ̇ ܥܲܠ ܐܝܼܬܘܼܬܵܐ ܕܡܝܼܵܐ. ܗܵܕܟ̣ܵܐ ܠܲܐܙܸܡ ܝܠܵܗ̇ ܕܡܗܘܼܡܢܸܐ ܝܵܥܢܸܐ ܥܸܕܬܵܐ ܩܲܕܝܼܫܬܵܐ ܡܲܫܬܝܼܵܐ ܠܵܗ̇ ܐܵܗܵܐ ܕܘܼܢܝܸܐ ܒܝܼ ܡܝܼܵܐ ܕܪܘܼܚܵܢܘܼܬܵܐ ܘܒܵܪܝܵܐ ܒܠܸܒܵܘܵܬܸܐ ܕܒܲܪܢܵܫܘܼܬܵܐ ܚܲܝܘܼܬܵܐ ܪܘܼܚܵܢܵܝܬܵܐ ܐܲܢܸܐ ܡܝܼܵܐ ܝܼܢܵܐ ܗ̇ܘ ܪܘܼܚܵܐ ܕܩܘܼܕܫܵܐ ܕܒܝܼ ܗܲܝܡܵܢܘܼܬܵܐ ܒܝܼܫܘܿܥ ܡܫܝܼܚܵܐ ܦܝܵܫܵܐ ܝܢܵܐ ܝܗܘܼܒ̣ܸܐ ܩܵܐ ܒܲܪܢܵܫܵܐ ܕܵܐܟ̣ܝܼ ܕܦܲܓ̣ܪܲܢ ܣܢܝܼܩܵܐ ܝܠܸܗ ܥܲܠ ܡܝܼܵܐ ܗܵܕܟ̣ܵܐ ܙܸܐ ܓܵܢܲܢ ܣܢܝܼܩܬܵܐ ܝܠܵܗ̇ ܥܲܠ ܪܘܼܚܵܐ ܕܩܘܼܕܫܵܐ. ܐܡܝܢ .

ܦܘܫܩܐ ܡ̣ܢ ܩܫ.ܬܐܘܡܐ ܫܝܼܢܘ