ܒܟܸܪܝܘ̣ܬܵܐ: ܥܸܠܬܵܐ ܩܲܕ̄ܡܲܝܬܵܐ ܕܒܵܥܘ̣ܬܵܐ ܕܒܸܥܒ̣ܵܕܘ̇ܗ̇ ܝܠܵܗ̇ ܥܸܕܬܵܐ ܕܐܲܠܵܗܵܐ ܕܝܼܵܢ: ܝܼܠܵܗ̇ ܒܵܥܘ̣ܬܵܐ ܕܢܝܼܢܘܵܝܸ̈ܐ . ܕܗܘܝܼܠܵܗ̇ ܗܵܕܟ̣ܵܐ ܒܟܵܪܘ̇ܙܘ̣ܬܵܐ ܕܝܵܘܢܵܢ ܢܒ̣ܝܼܵܐ ، ܘ ܒܝܼܘ̇ܗ̇ ܩܛܸܥܠܘ̣ܢ ܨܵܘܡܵܐ ܘ ܠܒ̣ܸܫܠܘ̣ܢ ܣܲܩܵܐ ܐܲܝܟ̣ ܕܝܼܠܵܗ̇ ܟܬܸܒ̣ܬܵܐ ، ܘ ܟܲܕ ܚܙܝܼܠܸܗ ܐܲܠܵܗܵܐ ܬܝܵܒ̣ܘ̣ܬܲܝ ܡܘ̣ܟܠܝܼܠܸܗ ܡܸܢܲܝ ܚܸܡܬܵܐ ܕܟܲܪܒܘ̣ܗܝ ܘ ܠܵܐ ܩܲܡ ܩܵܛܸܠܘ̣ܢ ܀ ܐܝܼܢܵܐ ܥܸܠܬܵܐ ܐ̄ܚܸܪ̄ܬܵܐ: ܕܒܘ̣ܬ ܚܵܛܸܪܘ̇ܗ̇ ܒܙܲܒ̣ܢܲܢ ܐܗܵܐ ܦܝܵܫܵܐ ܝܠܵܗ̇ ܥܒ̣ܸܕܬܵܐ ܒܐܲܢܸܐ ܐܲܬܪ̈ܵܘܵܬܸܐ : ܝܼܗܘܵܐ ܡܵܘܬܵܐ ܕܦܝܼܫܵܐ ܝܗܘܵܐ ܩܸܪܝܵܐ ܫܵܪܥܘ̣ܛܵܐ: ܕܝܼܗܘܵܐ ܒܡܲܠܟܘ̣ܬܵܐ ܕܦܲܪܵܣܵܝܸܐ ܘ ܒܐܲܢܸܐ ܐܬܪ̈ܵܘܵܬܸܐ ܕܝܼܵܢ.

 ܡܣܵܒܲܒ ܙܘ̇ܕܘ̣ܢܝܘ̣ܬܵܐ ܕܚܛܝܼܬܵܐ ܕܐ̄ܢܵܫܸܐ. ܕܒܗ̇ܝ ܥܕܵܢܵܐ ܪܵܒܵܐ ܦܢܸܐ ܠܸܗ ܠܟܠܲܝ ܒܢܲܝܢܵܫܵܐ ܕܒܸܝܬ ܓܲܪܡܵܝ ܘ ܐܵܬܘ̇ܪ ܘ ܢܝܼܢܘܸܐ. ܘ ܟܸܐ ܨܵܠܝܼ ܗܘ̈ܘ ܠܐܲܠܵܗܵܐ ܕܡܵܟܠܸܐ ܗܘܵܐ ܡܚܵܝܬܵܐ ܕܟܲܪܒܵܐ ܕܟܸܐ ܡܲܚܪܸܒ̣ܵܐ ܗܘܵܐ ܠܸܡܕܝܢ̄ܬܲܝ. ܘ ܦܸܫܠܵܗ̇ ܫܡܸܥܬܵܐ ܗܸܡܸܙܡܲܢ ܕܡܲܠܲܐܟ̣ܐ ܕܐܵܡܪܵܐ : ܕܒ̣ܘ̣ܩܘ̣ܢ ܨܵܘܡܵܐ ܘ ܥܒ̣ܘ̣ܕܘ̣ܢ ܒܵܥܘ̣ܬܵܐ ܘ ܦܵܝܸܫ ܟܸܠܝܵܐ ܡܵܘܬܵܐ ܡܸܢܘ̇ܟ̣ܘ̣ܢ ܘ ܗܵܪ ܒܗ̇ܝ ܣܵܥܵܬ ܦܩܸܕܠܘ̣ܢ ܕܓ̰ܡܸܥ ܥܲܡܵܐ ܕܡܵܪܝܵܐ ܡ̣ܢ ܟܠܲܝ ܛܝܘ̣̈ܦܸܐ ܠܒܲܝܬܵܐ ܕܡܵܪܝܵܐ. ܘ ܒܗ̇ܘ ܝܵܘܡܵܐ ܩܲܕ̄ܡܵܝܵܐ ܕܒܵܥܘ̣ܬܵܐ ܕܝܼܗܘܵܐ ܬܪܸܝܢܒܫܲܒܵܐ ܟܠܝܼܠܵܗ̇ ܐܝܼܕܵܐ ܕܡܲܠܲܐܟ̣ܵܐ ܕܟܸܐ ܡܲܚܪܸܒ̣ ܗܘܵܐ. ܘ ܠܵܐ ܦܸܫܠܸܗ ܡܸܚܝܵܐ ܐ̄ܢܵܫܵܐ ، ܐܝܼܢܵܐ ܟ̰ܸܡ ܚܲܕ̄ܟ̰ܵܐ ܡܸܬܠܘ̣ܢ ܗ.ܕ. ܚܲܕܟܡܵܐ ܡ̣ܢ ܐܵܢܝܼ ܕܝܼܗܘ̈ܘ ܕܒ̣ܝܼܩܸ̈ܐ ܡܲܪܥܵܐ ܕܫܲܪܥܘ̣ܛܵܐ.

. ܘ ܟܲܕ ܡܛܝܼܠܸܗ ܝܵܘܡܵܐ ܕܸܫܬܵܐ ܕܫܲܒܬܵܐ ܕܝܼܗܘܵܐ ܝܵܘܡܵܐ ܕܲܥܪܘ̣ܒ̣ܬܵܐ ، ܘ ܫܘ̣ܬܸܦܠܸܗ ܟܠܸܗ ܥܲܡܵܐ ܒܕܸܒ̣ܚܬܵܐ ܕܦܲܓ̣ܪܸܗ ܚܲܝܵܐ ܘ ܕܸܡܸܗ ܩܲܕܝܼܫܵܐ ܕܲܡܫܝܼܚܵܐ ܘ ܦܸܫܠܘ̣ܢ ܦܘ̣̈ܚܠܸܐ ܘ ܩܘ̣̈ܕܫܸܐ. ܐܵܦ ܡ̣ܢ ܐܢܝܼ ܕܝܼܗܘ̈ܘ ܬܸܦܝܸ̈ܐ ܡܲܪܥܵܐ ܒܦܲܓ̣ܪ̈ܲܝ ܟ̰ܘ̣ ܚܲܕ̄ ܐ̄ܢܵܫܵܐ ܠܵܐ ܡܸܬܠܸܗ. ܘ ܗܵܕܟ̣ܵܐ ܚܙܝܼܠܵܗ̇ ܥܸܕܬܵܐ ܪ̈ܵܥܵܘܵܬܸܐ ܘ ܡܲܪܵܥܝܵܬܲܝ ܪ̈ܲܚܡܸܐ ܕܸܗܘܝܼܠܘ̣ܢ ܥܲܠܲܝ ܒܘ̣ܬ ܚܵܛܸܪ ܒܵܥܘ̣ܬܵܐ ܕܸܥܒ̣ܸܕܠܘ̣ܢ ، ܩܛܸܥܠܘ̣ܢ ܘ ܛܘ̣ܟܸܣܠܘ̣ܢ ܕܦܵܝܫܵܐ ܥܒ̣ܸܕܬܵܐ ܒܵܥܘ̣ܬܵܐ ܟܠ ܫܸܢ̄ܬܵܐ ܒܫܸܢ̄ܬܵܐ ܒܐܗܵܐ ܫܵܒ̣ܘ̇ܥܵܐ ܘ ܪ̄ܚܸܫܠܵܗ̇ ܘ ܣܘ̣ܢܣܸܠܵܗ̇ ܡ̣ܢ ܗܵܝܓܵܗܵܐ ܘ ܗܵܠ ܐܕܝܼܵܐ ܒܐܬܪ̈ܵܘܵܬܸܐ ܕܝܼܵܢ ܘ ܦܸܫܠܵܗ̇ ܡܘ̣ܟܡܵܠܬܵܐ ܒܚܵܡܚܘܵܪܘ̣ܬܵܐ.

ܦܸܫܠܵܗ̇ ܫܩܸܠܬܵܐ ܡ̣ܢ ܟܬܵܒ̣ܵܐ ܕܚܘ̣ܕܪܵܐ ܦܠܓܘ̣ܬܵܐ ܐ. ܛܪܦܐ ܩܣܐ. ܕܛܟ̣ܣܐ ܕܟܠܕܝ̈ܐ

ܡܪܝ ܬܐܘܡܐܣ ܡܝܪܡ ܡܛܪܢ