ܚܕܒܫܒܐ ܘ ܕܕܢܚܐ

ܐܘܢܓܠܝܘܢ ܕܝܘܚܢܢ ܩܦܠܐܘܢ 3 ܡܢܝܢܐ 22 ܗܠ ܦܪܩܬܐ.

ܓܵܘ ܐܸܘܲܢܓܵܠܝܼܘܿܢ ܕܐܸܕܝܵܘܡ ܒܸܚܙܵܝܵܐ ܝܘܲܚ ܩܵܐܕ ܕܚܲܕܟܡܵܐ ܡ̣ܢ ܬܲܠܡܝܼܕܸܐ ܕܝܘܼܚܲܢܵܢ ܡܲܥܡܸܕܵܢܵܐ ܒܸܕܪܵܫܵܐ ܝܢܵܐ ܥܲܡ ܚܲܕ ܝܗ̄ܘܼܕܵܝܵܐ ܥܲܠ ܫܲܪܒܵܐ (ܩܸܣܲܬ) ܕܕܲܟ̣ܝܘܼܬܵܐ ܢܵܡܘܿܣܵܝܬܵܐ. ܡܘܼܡܟܸܢ ܗ̇ܘ ܝܗ̄ܘܼܕܵܝܵܐ ܝܼܗܘܵܐ ܚܲܕ ܡ̣ܢ ܬܲܠܡܝܼܕܸܐ ܕܡܫܝܼܚܵܐ. ܒܸܚܙܵܝܵܐ ܝܘܲܚ ܬܲܠܡܝܼܕܸܐ ܕܝܘܼܚܲܢܵܢ ܡܲܥܡܸܕܵܢܵܐ ܒܸܪܥܵܫܵܐ ܝܢܵܐ ܩܵܐܕ ܪܵܒܵܐ ܓܵܢܵܬܸܐ ܒܸܐܙܵܠܵܐ ܝܢܵܐ ܠܟܸܤ ܡܫܝܼܚܵܐ. ܒܘܼܬ ܕܐܵܗܵܐ ܡܸܢܕܝܼ ܐܵܢܝܼ ܚܸܫܵܐ ܒܸܥܒ̣ܵܕܵܐ ܝܢܵܐ. ܐܝܼܢܵܐ ܡ̣ܢ ܗܲܡܙܲܡܬܵܐ ܕܝܘܼܚܲܢܵܢ ܗܵܕܟ̣ܵܐ ܦܲܪܡܘܼܝܸܐ ܝܘܲܚ ܕܣܘܼܦܝܵܐ ܗܘܵܐ ܩܬܵܝ ܩܵܐܕ ܥܲܠ ܕܐܵܗܵܐ ܡܸܢܕܝܼ ܠܵܐ ܥܒ̣ܕܝܼ ܗܘܵܘ ܚܸܫܵܐ. ܕܐܲܝܟܼ ܕܝܼܠܸܗ ܒܸܐܡܵܪܵܐ ܐܲܠܵܗܵܐ ܩܵܐ ܟܠ ܚܲܕ ܐ̄ܢܵܫܵܐ ܝܘܼܗܒ̣ܵܐ ܝܠܸܗ ܚܕܵܐ ܚܲܠܥܲܬ ܦܪܝܼܫܬܵܐ ܩܵܐ ܬܲܡܲܡܬܵܐ ܕܚܕܵܐ ܡܸܫܬܲܐܠܵܢܘܼܬܵܐ ܦܪܝܼܫܬܵܐ ܘܡܲܙܝܘܼܕܸܐ ܝܠܸܗ ܘܒܸܐܡܵܪܵܐ ܠܸܐ ܡܵܨܸܐ ܚܲܕ ܐ̄ܢܵܫܵܐ ܠܫܩܵܠܵܐ ܡܸܢܕܝܼ ܐܸܢ ܠܵܐ ܦܵܐܸܫ ܝܘܼܗܒ̣ܵܐ ܐܸܠܸܗ ܡ̣ܢ ܫܡܲܝܵܐ. ܝܘܼܚܲܢܵܢ ܐܝܼܬ ܗܘܵܐܠܸܗ ܫܠܝܼܚܘܼܬܵܐ ܩܵܐ ܗܲܕܲܪܬܵܐ ܕܐܘܼܪܚܵܐ ܕܐܬܵܝܬܵܐ ܕܡܫܝܼܚܵܐ.

ܒܸܚܙܵܝܵܐ ܝܘܲܚ ܕܗܸܝܟ̰ ܥܕܵܢܵܐ ܠܵܐ ܒܥܸܐܠܸܗ ܕܡܲܪܸܡܠܵܗ̇ ܓܵܢܸܗ ܕܵܐܟ̣ܝܼ ܕܝܼܗܘܵܘ ܐ̄ܢܵܫܸܐ ܒܸܒܥܵܝܵܐ ܡܸܢܸܗ. ܘܐܝܼܡܲܢ ܕܒܸܚܙܵܝܵܐ ܗܘܵܐ ܐ̄ܢܵܫܸܐ ܒܸܐܙܵܠܵܐ ܝܢܵܐ ܒܵܬ̄ܪ ܡܫܝܼܚܵܐ ܗ̇ܘ ܪܵܒܵܐ ܒܸܚܕܵܝܵܐ ܗܘܵܐ. ܟܸܐ ܡܵܨܲܚ ܕܬܲܢܲܚ ܟܠܸܗ ܢܝܼܫܵܐ ܘܫܠܝܼܚܘܼܬܵܐ ܕܝܘܼܚܲܢܵܢ ܡܲܥܡܸܕܵܢܵܐ ܝܼܗܘܵܐ ܩܵܐ ܚܸܩܪܵܐ ܕܡܫܝܼܚܵܐ. ܗ̇ܘ ܝܼܗܘܵܐ ܡ̣ܢ ܐܲܪܥܵܐ ܐܝܼܢܵܐ ܡܫܝܼܚܵܐ ܡ̣ܢ ܫܡܲܝܵܐ ܡܸܢܕܝܼ ܕܚܸܙܝܵܐ ܝܠܸܗ ܘ ܫܡܸܥܵܐ ܝܠܸܗ ܒܘܼܬ ܕܗ̇ܘ ܒܝܵܗܒ̣ܵܐ ܝܠܸܗ ܣܵܗܕܘܼܬܵܐ ܘ ܣܵܗܕܘܼܬܸܗ ܫܲܪܝܼܪܬܵܐ ܝܠܵܗ̇.

ܡܫܝܼܚܵܐ ܝܼܠܸܗ ܗܸܡܸܙܡܵܢ ܕܐܲܠܵܗܵܐ ܘܐܸܢ ܩܲܒܠܲܚ ܠܐܵܗܵܐ ܡܸܢܕܝܼ ܠܐܲܠܵܗܵܐ ܩܲܒܘܼܠܸܐ ܝܘܲܚ. ܐܝܼܢܵܐ ܐܸܢ ܠܵܐ ܩܲܒܠܲܚ ܠܸܗ ܠܐܲܠܵܗܵܐ ܙܸܐ ܠܸܐ ܝܘܲܚ ܩܲܒܘܼܠܸܐ. ܣܵܒܵܒ ܟܠ ܐ̄ܢܵܫܵܐ ܕܠܵܐ ܩܲܒܸܠܠܵܗ̇ ܣܵܗܕܘܼܬܵܐ ܕܡܫܝܼܚܵܐ ܡܲܥܢܵܝܘܿܗ̇ ܝܼܠܵܗ̇ ܕܠܸܐ ܝܠܸܗ ܩܲܒܘܼܠܸܐ ܠܐܲܠܵܗܵܐ. ܡܫܝܼܚܵܐ ܒܪܘܿܢܵܐ ܝܼܚܝܼܕܵܝܵܐ ܕܐܲܠܵܗܵܐ ܒܝܲܕ ܡܲܥܡܘܼܕܝܼܬܸܗ ܦܸܫܠܸܗ ܓܸܠܝܵܐ ܩܵܬܲܢ ܘܒܝܲܕ ܡܵܘܬܸܗ ܥܲܠ ܙܩܝܼܦܵܐ ܗܘܸܠܸܗ ܕܸܒ̣ܚܵܐ ܡ̣ܢ ܓܸܒܵܐ ܕܚܛܝܼܵܬܲܢ ܦܸܫܠܸܗ ܝܕܸܥܵܐ ܦܵܪܘܿܩܵܐ ܕܟܠܲܝ ܒܢܲܝܢܵܫܵܐ. ܘܪܘܼܚܵܐ ܕܩܘܼܕܫܵܐ ܥܲܠ ܕܐܵܗܵܐ ܣܲܪܲܣܬܘܼܬܵܐ ܩܵܐܕ ܝܼܫܘܿܥ ܡܫܝܼܚܵܐ ܝܼܠܸܗ ܒܪܘܿܢܵܐ ܝܼܚܝܼܕܵܝܵܐ ܕܐܲܠܵܗܵܐ ܘܦܵܪܘܿܩܵܐ ܕܒܲܪܢܵܫܵܐ ܒܝܵܗܒ̣ܵܐ ܝܠܸܗ ܣܵܗܕܘܼܬܵܐ. ܣܵܒܵܒ ܚܲܕ ܡ̣ܢ ܫܘܼܓ̣ܠܵܢܸܐ ܕܪܘܼܚܵܐ ܕܩܘܼܕܫܵܐ ܝܼܠܸܗ ܣܵܗܕܘܼܬܵܐ ܒܘܼܬ ܣܲܪܲܣܬܘܼܬܵܐ.

ܒܲܤ ܕܬܠܵܬܵܐ ܣܵܗܕܸܐ ܝܵܥܢܸܐ ܡܲܥܡܘܼܕܝܼܬܵܐ ܕܡܫܝܼܚܵܐ ܘܡܵܘܬܸܗ ܥܲܠ ܙܩܝܼܦܵܐ ܘܣܵܗܕܘܼܬܵܐ ܕܪܘܼܚܵܐ ܕܩܘܼܕܫܵܐ ܒܸܓܠܵܝܵܐ ܝܢܵܐ ܩܵܬܲܢ ܩܵܐܕ ܕܝܼܫܘ̇ܥ ܡܫܝܼܚܵܐ ܒܫܲܪܝܼܪܘܼܬܵܐ ܝܼܠܸܗ ܒܪܘܢܵܐ ܝܼܚܝܼܕܵܝܵܐ ܕܐܲܠܵܗܵܐ ܘܦܵܪܘܿܩܵܐ ܕܕܘܼܢܝܸܐ. ܐܲܚܢܲܢ ܠܵܐܙܸܡ ܗܵܘܸܐܠܲܢ ܚܕܵܐ ܗܲܝܡܢܘܼܬܵܐ ܚܲܝܠܵܢܬܵܐ ܥܲܠ ܕܐܵܗܵܐ ܡܸܢܕܝܼ ܕܵܐܟ̣ܝܼ ܕܓܵܢܘܼܗܝ ܒܸܐܡܵܪܵܐ ܝܠܸܗ ܒܵܒܵܐ ܝܘܼܗܒ̣ܸܠܸܗ ܟܠ ܡܸܢܕܝܼ ܒܐܝܼܕܝܼ ܟܠ ܚܲܝܠܵܐ ܒܸܫܡܲܝܵܐ ܘܒܐܲܪܥܵܐ.

ܒܲܤ ܟܠܲܝ ܒܘܼܪܟܵܬܸܐ ܪܘܼܚܵܢܵܝܸܐ ܕܐܲܠܵܗܵܐ ܒܝܲܕ ܝܼܫܘܿܥ ܡܫܝܼܚܵܐ ܒܸܡܛܵܝܵܐ ܝܢܵܐ ܩܵܬܲܢ ܘܒܝܵܗܒ̣ܵܐ ܝܠܸܗ ܩܵܬܲܢ ܚܲܝܸܐ ܐܵܒܵܕܝܼܢܵܝܸܐ ܝܼܢܵܐ ܗܲܝܡܵܢܘܼܬܵܐ ܒܝܼܫܘܿܥ ܡܫܝܼܚܵܐ ܝܵܥܢܸܐ ܐܝܼܡܲܢ ܕܗܲܡܘܼܢܸܐ ܝܘܲܚ ܒܝܼܘܼܗܝ ܩܲܒܘܼܠܸܐ ܝܘܲܚ ܚܲܝܸܐ ܚܲܕܬܸܐ ܘܪܘܼܚܵܢܵܝܸܐ ܐܲܢܸܐ ܚܲܝܸܐ ܚܲܕܬܸܐ ܫܲܪܘܼܝܸܐ ܝܢܵܐ ܡ̣ܢ ܒܵܬ̄ܪ ܗܲܝܡܢܘܼܬܵܐ ܩܵܐܕ ܕܗܸܝܟ̰ ܥܕܵܢܵܐ ܠܸܐ ܦܵܪܩܝܼ . ܐܡܝܢ .

ܦܘܫܩܐ ܡ̣ܢ ܩܫ.ܬܐܘܡܐ ܫܝܼܢܘ