ܡܪܬܝ ܡܪܝܡ،  ܐܗܐ ܫܡܐ ܟ̮ܡ ܚܠܝܐ ܠܦܘܡܐ ܕܒܪܢܫܐ ܟܪܣܛܝܢܐ ܘܠܐ ܟܪܣܛܝܢܐ ، ܐܝܡܢ ܕܟܐ ܫܡܥܝ ܠܗ ܐܗܐ ܫܡܐ ܚܠܝܐ ܘܒܣܝܡܐ ܠܦܘܡܐ، ܟܐ ܝܣܩܝ ܠܗܘܢܝ ܬܚܡܢܝ̈ܬܐ ܟ̮ܡ ܥܠܝ̈ܐ ܕܩܕܝܫܘܬܐ ܘܕܟܝܘܬܐ ܘܨܦܝܘܬܐ ܘܚܠܝܘܬܐ ، ܘܟܐ ܡܡܛܝܠܘܢ ܠܟܤ ܡܪܢ ܘܐܠܗܢ ܘܦܪܘܩܢ ܘܡܚܝܢܢ ܝܑܫܘܥܡܫܝܚܐ .

ܒܘܬ ܡܪܬܝ ܡܪܝܡ ܐܠܦܝ̈ܐ ܘܐܠܦܝ̈ܐ ܕܟܬܒ̈ܐ ܘܡܐܡܪ̈ܐ ܘܛܪ̈ܦܐ ܦܝܫܐ ܝܢܐ ܟܬܝܒ̈ܐ ܘܒܙܝܩ̈ܐ ܒܟܠܗ̇ ܬܒܝܠ، ܘܟܠܝܘܡ ܟ̮ܡ ܒܨܘܪܐ ܚܕ ܟܬܒܐ ܦܝܫܐ ܝܠܗ ܛܒܝܥܐ ܒܘܬ ܕܝܠܝ̈ܬܐ ܘܣܢܓܪܘܬܐ ܘܥܠܝܘܬܐ ܕܐܗܐ ܝܡܐ ܒܬܘܠܬܐ . ܥܕܬܢ ܡܕܢܚܝܬܐ ܒܬܪܝܢ ܦܥܘܘܗ̇ ܟܠܕܝܬܐ ܘܐܬܘܪܝܬܐ ܟܐ ܡܬܒܐ ܐܝܩܪܐ ܘܩܕܪܐ ܟ̮ܡ ܥܠܝܐ ܘܟܐ ܡܣܩܐ ܩܘܠܣ̈ܐ ܘ ܪܘܡܪ̈ܡܐ ܩܐ ܐܗܐ ܝܡܐ ܩܕܝܫܬܐ ݂ ܡܢ ܕܘܪ̈ܐ ܩܕܝܡܝ ܒܒܘ̈ܬܐ ܘܡܠܦܢ̈ܐ ܕܥܕܬܢ ܒܟܬܒܐ ܝܢܐ ܘܡܝܩܘܪ̈ܐ ܝܢܐ ܩܐ ܡܪܬܝ ܡܪܝܡ ܒܬܘܠܬܐ ܩܕܝܫܬܐ ܣܒܒ ܕܝܠܗ̇ ܝܡܐ ܕܐܠܗܐ ، ܝܡܐ ܕܡܫܝܚܐ، ܝܡܐ ܕܡܪܢ ܘܐܠܗܢ ܘܦܪܘܩܢ ܘܡܚܝܢܢ ܝܑܫܘܥܡܫܝܚܐ . ܘܥܕܬܢ ܥܡ ܟܠܝ̈ ܥܕ̈ܬܐ ܕܕܘܢܝ̈ܐ، ܒܦܪܫܐ ܝܢܐ ܩܬܘܗ̇ ܥܐܕܘ̈ܬܐ ܘܕܘܟܪ̈ܢܐ ܘܒܒܢܝܐ ܝܢܐ ܥܠ ܫܡܘܗ̇ ܥܘܡܪ̈ܢܐ ܘܕܝܪ̈ܘܬܐ.

ܛܟܣܢ ܩܕܝܫܐ ܡܕܘܥܐ ܝܠܗ ܩܬܢ  ܬܠܬܐ ܥܐܕܘ̈ܬܐ ܟ̮ܡ ܩܕܝܡܝ ܒܚܝܘܬܐ ܕܥܕܬܢ ܐ ـ ܥܐܕܐ ܕܗܘܢܝܐ ܕܡܪܬܝ ܡܪܝܡ  ܕܟܐ ܗܘܐ ܐܕܝܘܡ 26 ܒܟܢܘܢ ܐ. ܩܕܝܡܝ ܟܐ ܕܒܩܝ ܗܘܐ ܠܗ ܒܥܪܘܒܬܐ ܕܬܪܬܝܢ ܕܒܬܪ ܝܠܕܐ . ܒ ـ ܥܐܕܐ ܕܡܪܬܝ ܡܪܝܡ ܢܛܪܢܬܐ ܕܙܪܘܥܬܐ ܟܐ ܗܘܐ 15 ܒܐܝܪ. ܓ ـ  ܥܐܕܐ ܕܫܘܢܝܐ ܕܡܪܬܝ ܡܪܝܡ ܠܫܡܝܐ ܒܓܢܐ ܘܒܦܓܪܐ . ܒܬܪ ܗܕܐ ܥܕܬܢ ܟܠܕܝܬܐ ܒܡܬܚܐ ܕܕܘܪ̈ܐ ܡܘܙܝܕܠܗ̇ ܠܝܘܡܢ̈ܐ ܦܪ̈ܝܫܐ ܠܐܝܩܪܐ ܕܡܪܬܝ ܡܪܝܡ : ܐ ـ ܣܘܒܪܐ ܕܡܪܬܝ ܡܪܝܡ 25 ܒܐܕܪ . ܒ ـ ܬܦܩܬܐ ܕܡܪܬܝ ܡܪܝܡ ܒܚܠܬܘܗ̇ ܐܠܝܫܒܥ 21 ܒܚܙܝܪܢ . ܓ ـ ܥܐܕܐ ܕܝܠܝܕܘܬܐ ܕܡܪܬܝ ܡܪܝܡ 8 ܒܐܝܠܘܠ.

ܥܐܕܐ ܕܫܘܢܝܐ ܕܡܪܬܝ ܡܪܝܡ ܠܫܡܝܐ ܒܓܢܐ ܘܒܦܓܪܐ ، ܝܠܗ ܚܕ ܡܢ ܐܢ̈ܐ ܥܐܕܘ̈ܬܐ ܟ̮ܡ ܩܕܝܡܝ ܒܬܫܥܝܬܐ ܕܟܠܗ̇ ܥܕܬܐ ܡܕܢܚܝܬܐ ܘܡܥܪܒܝܬܐ ، ܒܐܗܐ ܝܘܡܐ ܟܠܝ̈ ܥܘܡܪ̈ܢܐ ܕܐܝܢܐ ܦܝܫ̈ܐ ܒܢܝ̈ܐ ܠܫܡܐ ܕܡܪܬܝ ܡܪܝܡ ܐܗܐ ܝܡܐ ܒܬܘܠܬܐ ܘܩܕܝܫܬܐ ، ܗܘܝܐ ܝܢܐ ܡܠܝ̈ܐ ܡܢ ܡܗܝܡܢ̈ܐ ، ܓܘܪ̈ܐ ܘܙܥܘܪ̈ܐ ، ܘܒܐܠܦܝ̈ܐ ܕܐܠܦܝ̈ܐ ܕܟܠܦ̈ܬܐ ܒܐܙܠܐ ܝܢܐ ܡܐ̈ܐ ܕܡܝܠ̈ܐ ܘܒܥܒܕܐ ܝܢܐ ܢܕܪ̈ܐ ܘܡܩܪ̈ܘܒܐ ܝܢܐ ܩܘܪ̈ܒܢܐ ܘܒܨܝܡܐ ܘܨܠܘܝܐ ܝܢܐ ܒܚܕܐ ܗܝܡܢܘܬܐ ܫܚܝܢܬܐ ܕܝܠܗ̇ ܒܦܠܛܐ ܡܢ ܥܘܡܩܐ ܕܠܒܝ  ܕܩܒܠܝ ܗܝ ܚܕܘܬܐ ܪܘܚܢܝܬܐ ܕܠܓܘܝܐ ܩܐ ܚܝܘܬܝ ܥܡ ܒܘܪ̈ܟܬܐ ܘܫܦܩ̈ܬܐ ܕܐܗܐ ܝܡܐ ܒܬܘܠܬܐ ܕܠܥܠܡ، ܒܗܝ ܕܝܠܗ̇ « ܡܠܝܬܐ ܫܦܩܬ »  ܘܛܟܣܐ ܕܨܠܘܬܐ ܗܕܟܐ ܒܐܡܪܐ ܘܡܫܡܘܗܐ ܝܠܗ ܡܪܬܝ ܡܪܝܡ ܕܝܠܗ̇ ܒܘܫ ܓܘܪܬܐ ܡܢ ܫܡܝܐ ܒܗܝ ܕܒܪܘܢܐ ܐܠܗܝܐ ܩܢܘܡܐ ܬܪܝܢܐ ܕܬܠܝܬܝܘܬܐ ܩܕܝܫܬܐ ܠܐ ܦܘܪܩܠܗ ܠܥܠܡܐ ܟܕ ܗ̇ܘ ܒܫܡܝܐ، ܐܝܢܐ ܗܪ ܐܗܐ ܒܪܘܢܐ ܐܠܗܝܐ ܟܕ ܫܩܠ ܠܗ ܦܓܪܐ ܡܢ ܡܪܬܝ  ܡܪܝܡ ܦܘܪܩܠܗ ܠܕܘܢܝܐ ( ܚܙܝ ܛܟܣܐ ܕܨܠܘܬܐ ܕܥܕܬܐ ܟܠܕܝܬܐ ܚܘܕܪܐ ܕܘܒܩܐ ܐ. ܛܪܦܐ ܫܣܒ . ܚܙܝ ܛܟܣܐ ܕܨܠܘܬܐ ܕܥܕܬܐ ܡܕܢܚܝܬܐ ܐܬܘܪܝܬܐ ܚܘܕܪܐ ܕܘܒܩܐ ܐ. ܛܪܦܐ ܬܩܨܓ ).

ܟܠܝ̈ ܥܕܬ̈ܐ ܩܬܘ̈ܠܝܩܝܐ، ܐܪܬܕܘ̈ܟܣܝܐ، ܡܕܢܚܝ̈ܐ ܘܚܕܟܡܐ ܥܕܬ̈ܐ ܦܪ̈ܘܛܝܐ ܐܝܟ ܥܕܬܐ ܠܘܬܪܝܬܐ ܘܚܕ ܣܗܡܐ ܡܢ ܥܕܬܐ  ܐܢܓܠܝܟܢܝܬܐ ܕܟܐ ܦܝܫܐ ܩܪܝܬܐ ܐܢܓܠܘ ـ ܩܬܘܠܝܩܝܬܐ ܐܢܓܠܣܢܝܬܐ ܟܐ ܕܒܩܝ ܐܗܐ ܥܐܕܐ ܩܕܝܫܐ ܕܫܘܢܝܐ ܕܡܪܬܝ ܡܪܝܡ . ܐܝܢܐ ܥܕܬܐ ܩܬܘܠܝܩܝܬܐ ܗܝܡܢܘܬܐ ܒܫܘܢܝܐ ܕܡܪܬܝ ܡܪܝܡ ܠܫܡܝܐ ܒܓܢܐ ܘܒܦܓܪܐ ، ܝܠܗ̇ ܚܕ ܫܪܪܐ ܒܗܪܢܐ ܘܚܕ ܫܪܫܐ ܕܠܐ ܐܬܐ ܠܫܚܠܘܦܐ .  ܬܫܥܝܬܐ ܡܚܙܘܝܐ ܝܠܗ̇ ܩܬܢ ܐܗܐ ܥܐܕܐ ܦܝܫܐ ܝܗܘܐ ܡܙܘܝܚܐ ܡܢ ܕܘܪܐ ܕܐܪܒܥܐ ܘܚܕܟܡܐ ܟܬܒܝ̈ܬܐ ܕܣܘܪ̈ܝܝܐ ܕܝܗܘ̈ܘ ܦܝܫ̈ܐ ܡܘܦܠܚ̈ܐ ܒܕܘܪܐ ܕܚܡܫܐ ܡܕܟܘܪܐ ܝܢܐ ܐܗܐ ܥܐܕܐ ܘܒܚܛܪܓ̮ܡܥܘܬܐ ܐܢ̈ܐ  ܟܬܒܝ̈ܬܐ ܦܝܫ̈ܐ ܝܢܐ ܟܬܝܒ̈ܐ ܒܕܘܪܐ ܕܐܪܒܥܐ.

ܫܘܢܝܐ ܕܡܪܬܝ ܡܪܝܡ ܐܝܟ ܕܡܚܙܘܝܐ ܠܗ̇ ܬܫܥܝܬܐ ܗܘܝܐ ܝܠܗ ܒܐܘܪܫܠܡ ـ ܚܕܟܡܐ ܟ̮ܡ ܒܨܘܪܐ ܟܐ ܬܢܝ، ܗܘܝܐ ܝܠܗ ܒܐܦܣܘܤ ܡܕܝܢܬܐ ـ ܘܗܠ ܐܕܝܘܡ ܐܝܬ ܚܕ ܒܝܬܐ ܒܐܘܪܫܠܡ ܕܒܨܠܝܐ ܝܠܗ ܐ̄ܡܫܐ  ܩܘܪܒܒܐ ܕܥܣܪܝܢ ܦܠܟܢ̈ܐ ܬܚܘܬ ܐܪܥܐ ܘܟܐ ܩܪܝ ܠܗ ܒܝܬܐ ܕܩܒܪܐ ܕܡܪܬܝ ܡܪܝܡ . ܬܫܥܝܬܐ ܟܐ ܗܩܝܐ ܩܬܢ ܆ ܟܕ ܝܘ̈ܡܢܐ ܕܚܝܘܬܐ ܕܡܪܬܝ ܡܪܝܡ   ܬܡܠܘܢ ܒܐܗܐ ܥܠܡܐ ܒܪܘܢܘܗ̇ ܐܠܗܝܐ ܦܘܩܕܠܗ ܠܡܠܐܟ̈ܐ ܕܫܩܠܝ ܘܡܙܝܚܝ ܠܦܓܪܐ ܕܝܡܘܗܝ ܒܬܘܠܬܐ  ܘܗܕܟܐ ܬܠܡܝ̈ܕܐ ܓ̮ܡܥܠܘܢ ܡܢ ܟܠܗ̇ ܬܒܝܠ ܕܡܫܡܫܝ ܠܦܓܪܐ ܕܒܬܘܠܬܐ ܩܕܝܫܬܐ ܘܩܒܪܝܠܗ ܒܐܝܩܪܐ ܕܝܠܗ ܚܫܝܚܐ . ܡܪܝ ܬܐܘܡܐ ܫܠܝܚܐ ܡܛܝܠܗ ܒܬܪ ܚܕܟܡܐ ܝܘ̈ܡܢܐ، ܘܟܕ ܒܥܝܠܗ  ܕܡܩܪܒ ܐܝܩܪܐ ܠܝܡܐ ܒܬܘܠܬܐ، ܘܐܙܠܘܢ ܠܩܒܪܐ ܘܦܬܚܠܘܢ ܠܩܒܪܐ ܘܚܙܝܠܘܢ ܕܦܓܪܐ ܙܗܝܐ ܕܝܡܐ ܒܬܘܠܬܐ  ܠܝܬ ܬܡܢ̄، ܐܝܢܐ ܚܕܟܡܐ ܓ̮ܘ̈ܠܐ ܦܝܫ̈ܐ ܡܘܬܒ̈ܐ  ܠܚܕ ܡܪܙܐ . ܘܚܕܟܡܐ ܣܦܝܢܘ̈ܬܐ ܟܐ ܬܢܝ܆ ܩܐ ܫܘܪܪܐ ܕܐܗܐ ܫܘܢܝܐ ܩܕܝܫܐ ، ܡܪܬܝ ܡܪܝܡ ܡܘܨܠܝܠܗ̇ ܙܘܢܪܐ ܕܚܨܘܗ̇ ܩܐ ܡܪܝ ܬܐܘܡܐ ܩܐ ܕܗܡܢ  ܣܒܒ ܡܪܝ ܬܐܘܡܐ ܐܢ ܠܐ ܚܙܐ ܒܥܝܢܘܗܝ ܠܐ ܗܡܢ ܐܝܟ ܕܗܘܝܠܗ̇ ܒܩܝܡܬܐ ܕܡܪܢ ، ܟܕ ܒܬܪ ܗܕܐ، ܪܒܐ ܨܝܪ̈ܐ ܕܨܘܪ̈ܝܬܐ ܕܫܘܢܝܐ ܕܡܪܬܝ ܡܪܝܡ ܡܚܙܘܝܐ ܝܢܐ ܐܗܐ ܡܢܕܝ.

ܗܝܡܢܘܬܐ ܒܫܘܢܝܐ ܕܡܪܬܝ ܡܪܝܡ ܠܫܡܝܐ ܒܓܢܐ ܘܒܦܓܪܐ ܡܢ ܕܘܪܐ ܕܫܒܥܐ ܦܝܫܐ ܝܠܗ̇ ܩܘܒܠܬܐ ܐܝܟ ܚܕ ܫܪܪܐ ܒܟܠܝ̈ ܥܕ̈ܬܐ ܩܬܘܠܝ̈ܩܝܐ  ܘܐܪܬܕܘ̈ܟܣܝܐ ܘܒܥܕܬܐ ܩܘܦܛܝܬܐ ܘܒܟܠܝ ܥܕܬ̈ܐ ܕܡܕܢܚܐ ، ܘܟܐ ܕܒܩܝܠܗ ܐܗܐ ܝܘܡܐ 15 ܒܛܒܚ . ܡܪܢ ܦܦܐ ܡܪܝ ܦܝܘܤ ܕܬܪܥܣܪ ܒܣܝܩܘܡܐ ܕܚܕ ܒܬܫܪܝܢ ܬܪܝܢܐ ܫܢܬܐ 1951 ܒܫܘܠܛܢܐ ܕܐܝܬܠܗ ܐܝܟ ܬܚܠܘܦܐ ܕܡܪܝ ܦܛܪܘܤ ܡܘܕܥܝܠܗ ܐܗܐ ܫܪܪܐ ܩܐ ܟܠܗ̇ ܬܒܝܠ  ܕܫܘܢܝܐ ܕܡܪܬܝ ܡܪܝܡ ܒܓܢܐ ܘܒܦܓܪܐ ، ܝܠܗ ܚܕ ܫܪܪܐ ܬܐܘܠܘܓܝܐ ܕܘܓܡܬܝܩܝܐ ܕܠܐ ܐܬܐ ܠܫܚܠܘܦܐ .  ܕܠܙܡ ܟܠܝ̈ ܩܬܘܠܝ̈ܩܝܐ ܕܕܘܢܝܐ ܗܡܢܝ ܒܐܗܐ ܫܪܪܐ . ܡܪܝ ܦܝܘܤ ܕܬܪܥܣܪ ܐܗܐ ܝܘܠܦܢܐ ܘܐܗܐ ܡܕܥܬܐ  ܐܫܟܪܐ ܥܒܝܕܐ ܠܗ ܡܢ ܒܬܪ ܡ̈ܐܐ ܕܬܐܘܠܝ̈ܓܝܐ ܘܡܠܦܢ̈ܐ ܕܗܝܡܢܘܬܐ ܬܪܝܨܬ ܫܘܒܚܐ ܕܟܠܗ̇ ܥܕܬܐ ܨܘܚܨܝܠܘܢ ܘܕܪܫܠܘܢ ܠܐܗܐ ܫܪܪܐ ܘܡܫܘܪܪܘܢ ܠܐܗܐ ܝܘܠܦܢܐ ܘܗܝܡܢܘܬܐ ܕܝܗܘܐ ܡܢ ܝܘܡܢ̈ܐ ܩܕܡܝ̈ܐ ܕܟܪܣܛܝܢܘܬܐ ܘܒܡܬܚܐ ܕܕܘܪ̈ܐ ܘܕܘܪ̈ܐ ܫܩܠ ܠܗ̇ ܫܘܡܠܝܐ ܘܗܘܝܠܗ̇ ܒܘܫ ܒܗܪܢܬܐ ܒܢܣܒܬ ܕܫܘܢܝܐ ܕܡܪܬܝ ܡܪܝܡ ܒܓܢܐ ܘܦܓܪܐ ܠܫܡܝܐ. ܚܕܟܡܐ ܡܢ ܥܕ̈ܬܐ ܦܪ̈ܘܛܝܐ ܐܝܟ ܥܕܬܐ ܐܢܓܠܝܟܢܝܬܐ ܕܐܢܓܠܣܬܢ ، ܥܕܬ̈ܐ ܐܦܣܩܘ̈ܦܝܐ ܕܐܣܟܘܬܠܢܕ ، ܕܟܢܐܕܐ ܘܐܡܪܝܟܐ ܟܐ ܕܒܩܝ ܐܗܐ ܝܘܡܐ ܒܣܝܩܘܡܐ ܕ 15 ܒܛܒܚ ܘܟܐ ܩܪܝܠܗ ܝܘܡܐ ܕܡܢܝܚܬܐ ܕܡܪܬܝ ܡܪܝܡ ، ܥܕܬܐ ܐܢܓܠܝܟܢܝܬܐ ـ  ܩܬܘܠܝܩܝܬܐ ܟܐ ܩܪܝܐ ܠܗ ܐܗܐ ܝܘܡܐ ܗܪ ܐܝܟ ܥܕܬܐ ܩܬܘܠܝܩܝܬܐ ܝܘܡܐ ܕܫܘܢܝܐ ܕܡܪܬܝ ܡܪܝܡ ܠܫܡܝܐ ܒܓܢܐ ܘܦܓܪܐ.

ܥܕܬܢ ܩܕܝܫܬܐ ܕܠܐ ܦܘܫܟܐ ܟܐ ܗܡܢܐ ܗܝܡܢܘܬܐ ܫܪܝܪܬܐ ܒܫܘܢܝܐ ܕܡܪܬܝ ܡܪܝܡ  ܡܢ ܕܘܪ̈ܐ ܩܕܝܡܝ ܘܟܐ ܡܙܚܝܐ ܘܡܝܩܪܐ ܠܐܗܐ ܝܘܡܐ ܩܕܝܫܐ، ܟܠܝ̈ ܥܘܡܪ̈ܢܐ ܟܐ ܗܘܝ  ܡܠܝ̈ܐ ܡܢ ܡܗܝ̈ܡܢܐ ܕܐܝܬܠܗܘܢ ܚܕܐ ܥܒܕܬܟܪܘܬܐ ܦܪܝܫܬܐ ܩܐ ܐܗܐ ܝܡܐ ܒܪܝܟܬܐ ܘܟܐ ܡܩܪܒ݂ܝ ܩܘܪ̈ܒܢܐ ܘܨܠܘ̈ܬܐ ܥܡ ܨܘܡܐ ܘܥܪ̈ܘܢܐ ܐܝܟ ܢܝܫܢܩܐ ܕܚܘܒܐ ܘܐܝܩܪܐ ܘܛܥܢܬܐ ܕܡܢܬܐ ܡܢ ܐܗܐ ܝܡܐ ܩܕܝܫܬܐ ܒܬܘܠܬܐ ܕܠܥܠܡ.